Extinguido o último lume no parque natural do Invernadoiro tras case unha semana ardendo
As últimas estimacións apuntan que os incendios afectaron unha superficie de 99,16 hectáreas.
Por Galicia Confidencial | OURENSE | 27/08/2018 | Actualizada ás 22:22
A Consellería do Medio Rural informou da extinción do incendio que permanecía controlado no concello ourensán de Vilariño de Conso dentro do parque natural do Invernadoiro.
O lume comezou ás 16:10 da tarde do mércores 22 e quedou completamente extinguido hoxe ás 21:27 horas. Segundo as últimas estimacións o lume afectou unha superficie de 99,16 hectáreas, 70,16 de monte raso e outras 29 de arborado. Neste incendio traballaron 4 técnicos, 29 axentes, 79 brigadas, 33 motobombas, 5 pas, 16 helicópteros e 5 avións.
A Consellería do Medio Rural lembra que está a disposición da cidadanía o número de teléfono gratuíto 085, ao que deben chamar en caso de detectar algún lume forestal. Ademais, toda a información actualizada sobre incendios forestais poderá ser consultada na conta aberta de twitter: @incendios085.
