A economía galega desacelera o seu crecemento no segundo trimestre do ano

A economía galega creceu no segundo trimestre do ano un 0,6% con respecto ao tres primeiros meses de 2018, cun avance interanual do 2,8%, unha décima por encima da cifra española (2,7%), segundo os datos publicados este xoves polo Instituto Galego de Estatística (IGE).

Con todo, nesta subida apréciase unha lixeira desaceleración, xa que é o primeiro trimestre tras 10 consecutivos que o crecemento non alcanza un 3% de avance. Nun comunicado, a Xunta de Galicia destaca que os datos "constatan que a economía galega mantén un forte ritmo de crecemento", e confirman que a "recuperación económica continúa trasladándose ao mercado laboral", coa creación de 17.900 postos de emprego equivalentes a tempo completo, en comparación co mesmo período do ano 2017.

En termos interanuais --en comparación co mesmo trimestre do ano anterior-- o PIB galego avanzou no segundo trimestre un 2,8%, unha décima por encima da economía española, que foi do 2,7%. O IGE sustenta o crecemento da economía galega entre abril e xuño no incremento da demanda interna, que avanzou un 3%, e no bo comportamento das exportacións de bens e servizos, que aumentaron un 4,5%.

Os datos do organismo estatístico autonómico tamén mostran que a economía galega creceu un 0,6%, con respecto ao primeiro trimestre, situándose así o avance da economía galega nas mesmas cifras que o PIB nacional. É o dato máis baixo desde o primeiro trimestre de 2017.

Ademais, tamén se constata unha boa evolución no referente á formación bruta de capital --un indicador que permite coñecer o impacto dos investimentos que se realizan no ámbito empresarial--, que reflicte un avance neste período do 8,1%, o maior rexistrado nos últimos doce anos. No tocante aos sectores da economía galega, continúan en positivo, tanto a industria --cun incremento anual do 4,1% na industria manufacturera, a máis intensiva en emprego--, como en construción, do 6,0%, e os servizos, do 2,3%.

Tamén se rexistrou unha importante mellora do sector primario, que pasa de crecer un 0,3% a un 1,9%. A estrutura do Produto Interior Bruto a prezos de mercado, pola vía de oferta, reflicte que o sector servizos supón o 63%, a industria o 16,8%, a construción o 6,2% e a agricultura, gandaría, silvicultura e pesca o 4,8%.

17.900 NOVOS EMPREGOS A TEMPO COMPLETO

A Xunta de Galicia tamén puxo de relevo que as contas trimestrais do IGE confirman que a recuperación económica trasládase ao mercado laboral. Así, no primeiro trimestre de 2018 creáronse 17.864 empregos equivalentes a tempo completo, cun crecemento do 1,8% respecto ao segundo trimestre de 2017, dúas décimas máis que o rexistrado no trimestre anterior. O incremento foi maior no emprego asalariado, até situarse no 3,2%.

Os datos de contabilidade trimestral indican que o emprego a tempo completo está a crecer con forza na industria (3,9%), a construción (5,3%), os servizos (1,8%) e as actividades inmobiliarias (5,7%). En cambio, continúa a baixada en agricultura, gandaría, silvicultura e pesca, até alcanzar unha caída do 6,2%, cunha tendencia negativa xa rexistrada no último trimestre de 2017 (-2,0%) e o primeiro deste 2018 (-4,7%).