Animalistas queren saber cantas entradas gratis recibiu Alfonso Rueda pola súa presenza na feira taurina
Piden un "rexistro de lobbies" da caza e de "pseudosindicatos agrarios", en alusión ao sindicato nacionalista Fruga, no Parlamento e Xunta.
Por Galicia Confidencial | Compostela | 05/09/2018 | Actualizada ás 15:02
O portavoz de Libera, Rubén Pérez, rexistrou unha pregunta na Cámara galega na que denuncia que o vicepresidente da Xunta, Alfonso Rueda, acudiu á feira taurina de Pontevedra e púidoselle ver "moi feliz no palco de autoridades".
Así, pregunta se recibiu algunha invitación como vicepresidente e, en caso positivo, cantas entradas gratis recibiu; e cuestiona se "este tipo de actuacións representa ao 99,7% de cidadanía que nin quere, nin avala as corridas de touros" en Galicia.
A raís desta cuestión, tamén pregunta se o Goberno galego vai desenvolver algunha actuación para "evitar" que persoas de entre 12 e 18 anos poidan participar destes eventos con entrada libre.
"LOBBIES" DE CAZA
Por outra banda, os animalistas queren "someter a escrutinio" do Parlamento a creación “dun rexistro de grupos de interese actuantes na Xunta e no Parlamento autonómico" e "denuncian a influencia de sectores como a caza".
Neste sentido, poñen como exemplo a recente dimisión do ministro francés Nicolas Hulot, que denunciou a presenza de lobbistas profesionais en reunións interministeriais cando se abordaban asuntos relacionados coa materia e lembran que "en Galicia non hai ningunha regulamentación para lobbies nin axendas transparentes respecto diso".
Os animalistas denuncian a "ampliación" da tempada de caza que, din, "xurdiu despois de encontros entre escopeteros e Xunta" e critican as batidas preventivas de xabalíes "sen ningún aval científico". As críticas fanas extensivas a "pseudosindicatos e grupos relacionados coa industria cárnica", en alusión ao sindicato Fruga.
