Por Galicia Confidencial | Compostela | 10/09/2018 | Actualizada ás 13:58
A portavoz nacional do BNG, Ana Pontón, advertiu este luns de que "a cidade máis paralizada, que leva todo o mandato sen aprobar orzamentos" é a de Ourense, onde goberna un exconselleiro de Alberto Núñez Feijóo, e considerou que a "parálise" de Galicia só se liquidaría se o presidente da Xunta convoca "eleccións" e dá "un paso atrás", xa que non basta --di-- cunha "remodelación".
Así o reflexionou Pontón despois de que o mandatario autonómico abordase, nunha entrevista na Ser, a remodelación do seu goberno ante as eleccións municipais do próximo ano e para as que este mesmo fin de semana o titular de Política Social, José Manuel Rei Varela, anunciou a súa candidatura en Ferrol, onde xa foi alcalde.
"Temos un Feijóo esgotado, sen ideas. Non se soluciona o problema cunha remodelación, senón cunhas eleccións, dando un paso atrás", respondeu a líder nacionalista a preguntas dos xornalistas, tras cuestionar que "revalide" ao candidato en Ourense, Jesús Vázquez, que "xa foi conselleiro".
Pontón xulgou que Feijóo "non ten nada que ofrecer aos galegos" e só lle preocupa "como lle vai electoralmente" para o que, agregou, "non lle importa sequera que o Consello da Xunta" o use como "unha prolongación" da súa dirección política e como "incubadora de candidatos".
FEIJÓO "INCUMPRE A SÚA PLABRA"
Mentres, subliñou, os problemas dos galegos "seguen esperando". "Non se decata de nada: Non sabe o que pasa nos medios públicos, non sabía quen era Marcial Dorado, o prezo da luz, as peaxes... É un presidente que non se decata de nada e iso é unha moi mala noticia para Galicia", sentenciou.
Así as cousas, e tras aclarar que non ten "ningunha bóla de cristal" e por iso non pode augurar se Feijóo volverá presentarse ou non ás eleccións, Pontón concluíu que o mandatario autonómico "caracterízase por incumprir a súa palabra" e, por tanto, non lle sorprendería neste caso" que volvese suceder. "A súa palabra non vale absolutamente nada", sentenciou.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.