A Festa do Albariño de Cambados xa é de Interese Turístico Internacional
Convértese así na décima festa de Galicia con esta distinción, a máxima que se pode alcanzar neste ámbito.
Por E.P. | SANTIAGO DE COMPOSTELA | 11/09/2018 | Actualizada ás 19:18
O Ministerio de Industria adoptou esta declaración despois do correspondente informe favorable do Goberno galego que, nun comunicado, celebrou esta distinción que culmina o proceso que vén apoiando nos últimos anos. Ademais, o Albariño de Cambados convértese na primeira festa enogastronómica galega en ser recoñecida como de interese turístico internacional.
Así, únese á festividade do Apóstolo Santiago, á Romaría Viquinga de Catoira, o Festival Internacional do Mundo Celta de Ortigueira, A Rapa das Bestas de Sabucedo na Estrada, o Corpus Christi de Ponteareas, a Semana Santa de Viveiro, a Semana Santa de Ferrol, as Fogueiras de San Juan da Coruña e a festa da Arribada de Baiona.
A festa do Albariño é unha das celebracións vitivinícolas máis antigas de Galicia e a segunda de España, que conseguiu afianzarse nos últimos anos como "gran expoñente do potencial enogastronómico" da Comunidade galega. Ademais, é pioneira, xa que no seu día converteuse na segunda festividade de Galicia en ser declarada de interese nacional e na primeira da provincia de Pontevedra en conseguilo. Galicia suma 141 distincións entre as de interese internacional (dez), interese turístico nacional (11) e as de interese turístico de Galicia (120).
