En Marea pedirá no Parlamento explicacións sobre a contaminación por microcistina no encoro da Baxe

O portavoz de Veciñanza de Cuntis, Santi Martínez, criticou a "posición de abandono total e absoluto" da Xunta de Galicia e instou ao Concello a actuar con "maior intensidade".

Por E.P. | SANTIAGO DE COMPOSTELA | 15/09/2018 | Actualizada ás 14:43

Comparte esta noticia

En Marea pedirá no Parlamento de Galicia explicacións sobre o problema de contaminación por microcistina que afecta o encoro da Baxe, en Caldas de Reis (Pontevedra) e esixirá á Xunta as "solucións efectivas" ao problema que prometera "xa en 2011".

Antón Sánchez, viceportavoz de En Marea. EN MAREA
Antón Sánchez, viceportavoz de En Marea. EN MAREA | Fonte: Europa Press

"Estamos ante un problema que xa dura demasiados anos", asegurou o viceportavoz de En Marea, Antón Sánchez, nunha visita á zona, na que alertou que "pasan os anos e o problema de salubridade e ambiental que supón a presenza de microcistina no encoro mantense".

O tema, lembrou, leva xa varios anos xerando preocupación aos concellos aos que o encoro fornece auga para o seu consumo. As solucións efectivas reclamadas na mañá deste sábado tanto por En Marea como por Veciñanza de Cuntis desde A Baxe xa foran comprometidas pola administración autonómica.

Antón Sánchez incidiu así en que "o Plan Umia destinaba 20 millóns de euros a actuacións destinadas a corrixir este tema". "Queremos saber que se fixo realmente, porque se esas actuacións realizáronse e non foron efectivas, o que teriamos é unha ocultación e unha falta de transparencia", denunciou.

"Os veciños dos concellos de Cuntis, de Caldas e da contorna teñen dereito a coñecer tamén en que se gastan os orzamentos públicos, foi unha obra pouco pensada para o interese xeral, con moitas protestas que non foron atendidas", remarcou Sánchez, que agregou que "o tempo deu á razón aos que se opuñan a unha obra que, finalmente, só serviu para dar unha concesión hidroeléctrica a unha empresa" e que "non solucionou os problemas para os que foi creada".

Pola súa banda, o portavoz de Veciñanza de Cuntis, Santi Martínez, criticou a "posición de abandono total e absoluto" da Xunta de Galicia e instou ao Concello a actuar con "maior intensidade" á hora de reclamar solucións para un problema de contaminación "que vén de moito tempo atrás".

Santi Martínez lembrou que son os propios datos da Consellería de Medio Ambiente os que corroboran que a contaminación por microcistina continúa sendo un problema no encoro e reclamou unha solución "integral". "Non é asumible que Cuntis se resigne a ter auga embalsada contaminada", aseverou, asegurando que "mentres exista encoro vai seguir existindo contaminación por microcistina". Na visita realizada este sábado participaron tamén outros membros de Veciñanza de Cuntis, así como o deputado de En Marea por Pontevedra Marcos Cal.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta
Comentarios 1 comentario

1 caserio de Waldo 650.000 euros

estaban de merenda... os moi non baixaron o pe do encoro, non percorreron o cauce nin as orillas, POSADO ENGANADOR, NON SE FIEN!!!! do caserio non fien!!!! están moito pior o encoro das conchas na baixa limia, pola eutrofización do río lima, ha que mollar os pes, ha que traballar un pouco, son nugalleiros... lamentable imaxe que queima as retinas, lamentable posado da politicastria!