Fin da folga indefinida en Maderas Iglesias tras chegar a un acordo empresa e traballadores
Os empregados aprobaron por 103 votos a favor, 80 en contra, dous brancos e tres nulos o acordo coa dirección, na que se inclúen as súas reivindicacións relativas á apertura da negociación dun convenio e prazos para o cobro dos salarios debidos.
Por Galicia Confidencial | Vigo | 19/09/2018 | Actualizada ás 17:55
Os traballadores de Maderas Iglesias acordaron desconvocar a folga indefinida que iniciaron o pasado 28 de agosto tras aceptar —por 103 votos a favor, 80 en contra, dous brancos e tres nulos— unha proposta feita pola dirección da empresa, na que se inclúen as súas reivindicacións relativas á apertura da negociación dun convenio e prazos para o cobro dos salarios debidos, segundo fontes da CIG.
Así, aínda que o pasado día 11 a asemblea de traballadores tombou un preacordo subscrito entre a empresa e os representantes do comité coa mediación do Consello Galego de Relacións Laborais, por "falta de confianza cara á empresa", nesta ocasión a votación foi favorable e deuse luz verde á desconvocatoria da folga despois de 17 días.
En concreto, este acordo establece que a empresa, con data límite do 20 de setembro, abonará 700 euros lineais a todos os traballadores a conta da nómina de agosto. De non cubrir o total do salario dese mes, a diferenza abonarase cando se realicen as nóminas; e de superalo, descontarase da paga extraordinaria de xullo.
Ademais, páctase que a empresa abonará a paga extra de xullo antes do 15 de outubro, e o salario do mes de setembro antes do 10 de outubro.
De igual maneira, estipúlase que todas as mensualidades abonaranse antes do día 10 do mes seguinte.
A maiores, en outubro abrirase a mesa negociadora do convenio colectivo, na que a primeira decisión será subir os salarios un 3% correspondente a 2018, o que será efectivo desde o 1 de xaneiro de 2019.
Posteriormente, en marzo de 2019 abrirase outra mesa para negociar as táboas salariais de 2019, e ademais a empresa comprométese a manter o emprego actual ata novembro dese ano, aínda que os que queiran extinguir a súa relación laboral voluntariamente poderanse acoller ás condicións dos últimos despedimentos do ERE de xuño de 2018.
