O Concello de Santiago "blinda" xudicialmente as estatuas de Abraham e Isaac

A demanda civil interposta polo Concello de Santiago contra os herdeiros de Francisco Franco en relación ás estatuas do Pórtico de Abraham e Isaac "blinda" estes elementos patrimoniais ante unha posible venda ata que haxa unha resolución xudicial.

Así o indicou o alcalde de Santiago, Martiño Noriega, en resposta a preguntas dos medios sobre a posibilidade de que a venda anunciada por un neto de Franco da súa parte da herdanza do Pazo de Meirás --que inclúe estas dúas estatuas-- puidese afectar as pretensións municipais de recuperalas para o patrimonio público. "Entendemos desde a asesoría xurídica que non, ao estar xudicializado e o proceso pendente de xuízo", dixo Noriega, que lembrou que a vista previa deste caso será en Madrid en outubro e confía en que o xuízo se celebre "antes de final de ano".

Neste panorama, "calquera tipo de acción que afectase o patrimonio en litixio terá que ser comunicado ás partes", dixo o alcalde. "O feito de presentar a demanda civil nos blinda desa posibilidade, polo menos no procedemento xudicial", resolveu.

Noriega lembrou que o Concello de Santiago é "pioneiro no proceso de recuperación patrimonial" dos bens da familia Franco. "Mentres outros debaten quen ten que facer que, o Concello de Santiago leva un tempo actuando", apuntou, en referencia á Xunta e ao Ministerio de Cultura, que debaten o inicio de accións legais para reclamar a devolución do Pazo de Meirás.