Santiago quere limpar 647 quilómetros de sumidoiros para evitar inundacións
Operarios, camións e máquinas de Viaqua despréganse na capital para evitar futuras inundacións coa chegada das chuvias de outono.
Por Galicia Confidencial | Santiago de Compostela | 28/09/2018 | Actualizada ás 12:55
A empresa Viaqua vai intensificar durante o mes de outubro o programa de limpeza preventivo da rede urbana de Santiago, formada por 647 quilómetros, co obxectivo de preparar a rede de rede de sumidoiros, ante a estación de outono e a chegada das choivas.
Por iso, despregará brigadas de operarios, camións e máquinas co obxectivo de asegurar que os elementos do sistema na rede de sumidoiros se atopen ao máximo da súa capacidade hidráulica para evacuar, con garantías, as augas pluviais durante os episodios de choiva.
“Estas tarefas, que se levan a cabo ao longo de todo o ano, responden a un sistema avanzado de xestión que inclúe tanto a frecuencia de inspección como a limpeza a fondo das canalizacións da rede de sumidoiros e da rede de augas pluviais, facendo especial fincapé nos puntos conflitivos”, explica a entidade nun comunicado.
Esta empresa municipal destaca que realiza periodicamente inspeccións da rede de saneamento con cámara de TV, co obxectivo de localizar aqueles puntos da rede nos que haxa algunha obstrución. As tarefas de limpeza realizaranse en horario nocturno nas zonas máis céntricas, ao obxecto de non entorpecer o tráfico rodado nin a actividade da cidade durante o día.
Viaqua suliña que, para finais de ano, completarase a limpeza dos 21.501 pozos de rexistro da rede de 647 quilómetros de rede de sumidoiros; e limparanse un total de 10.745 sumidoiros. “Para manter en correcto estado a rede é imprescindible a colaboración cidadá”, indica, polo que aconsella non tirar á rede de pluviais produtos como lixivia, xabóns ou pintura, xa que acaban directamente nas canles fluviais.
