Un ciclista ferido grave despois de ser alcanzado por un camión en Nigrán

Un ciclista resultou ferido de gravidade despois de ser alcanzado por un camión cando circulaba pola Avenida de Val Miñor, no Concello pontevedrés de Nigrán. O 112 Galicia recibiu a alerta ás 11,20 horas e, nese momento, informou aos membros do GES de Val Miñor e aos axentes da Policía Local.

Pola súa banda, os profesionais sanitarios xa estaban a enviar unha dotación no momento para a atención do ciclista que, segundo os servizos de emerxencias alí desprazados, presentaba lesións de carácter grave. Finalmente, foi evacuado nunha ambulancia do 061-Urxencias Sanitarias ao centro hospitalario de referencia. Con respecto ao condutor do camión, resultou ileso e a carga do vehículo, que transportaba gasóleo, intacta.

ACCIDENTE CUN AUTOBÚS IMPLICADO EN PORTO DO SON

Así mesmo, durante esta mañá, o 112 Galicia tamén tivo coñecemento doutro accidente de tráfico no que se viron implicados un autobús de pasaxeiros, que realizaba a ruta Ribeira-Noia, e un turismo, á altura do Concello coruñés de Porto do Son. Segundo informou o 112, os ocupantes do autocar, aproximadamente 15 persoas, resultaron ilesos, mentres que o condutor do coche necesitou asistencia médica aínda que as lesións que presentaba eran de carácter leve.

Foi unha persona particular a que contactou co 112 Galicia ás 10,40 horas deste mércores 3 de outubro para alertar e, dende o Centro Integrado de Atención ás Emerxencias de Galicia, pediuse a colaboración dos servizos sanitarios de urxencia, así como dos axentes da Garda Civil de Tráfico, voluntarios e bombeiros de Ribeira para a atención dos afectados. Finalmente, comprobouse o bo estado de saúde dos pasaxeiros e proporcionouse asistencia médica ao condutor do turismo. Tamén se descartou a intervención dos bombeiros, xa que todos estaban liberados e accesibles.