Por E.P. | Santiago de Compostela | 05/10/2018 | Actualizada ás 15:25
O BNG lanza unha campaña contra a "estafa" da factura da luz, que incluirá unha recollida de sinaturas, iniciativas e mocións no Parlamento galego e concellos, así como charlas informativas, folletos e accións "sorpresa".
Diso informaron este venres en Santiago a deputada Noa Presas e o responsable de Organización do Bloque, Bieito Lobeira, quen alertaron de que os galegos van pagar a luz "máis alta do Estado", a pesar de que Galicia é unha das principais comunidades produtoras.
Baixo o lema 'Paréceche normal?', esta campaña reclama unha baixada do IVE que se paga pola luz (do 21%), "o máis caro de Europa" após a suba impulsada polo Goberno de Rajoy, ao superreducido do 4%. Tamén se demanda que Galicia non sexa incluída na orde do Goberno de suplementos territoriais, pois "en caso de facelo quen ten que pagar é o Goberno central"; á vez que se avoga por unha tarifa eléctrica galega.
Respecto diso, Noa Presas explica que se busca unha "resposta" á "estafa" que sofren os galegos en cada factura, que "non fai máis que ir en aumento" por "decisións políticas" da Xunta e o Goberno, mentres os salarios e pensións dos galegos seguen á cola. Lembra que desde o comezo da crise subiu un 80% e no último ano un 9%.
"COLONIALISMO"
"O que temos é o auténtico manual do colonialismo", resume Bieito Lobeira, quen censura que Galicia sofre os "custos ambientais" de encoros e saltos hidroeléctricos, mentres fornece outras zonas do Estado e paga as facturas máis altas.
Por iso, ve necesaria esta campaña social "intensa" por todo o territorio para dar a coñecer as razóns de fondo de "raíz política" polas cales os galegos van pagar máis cara a electricidade.
Ante isto, Presas carga contra a "inacción" da Xunta e as medidas "cosméticas" do Goberno central sen repercusión real na baixada da luz, á vez que as eléctricas "reciben miles de millóns en beneficios".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.