Un percorrido pola Vía da prata en Ourense conmemora o sábado os 25 anos do 'Xacobeo 93'

Un percorrido pola Vía da prata en Ourense inaugura o sábado as 'Camiñadas' coas que se conmemoran os 25 anos do 'Xacobeo 93', nunha ruta de oito quilómetros que atravesará o centro histórico da cidade.

As actividades están organizadas pola Asociación de Xornalistas e Estudiosos do Camiño de Santiago (APECSA). Os participantes percorrerán unha ruta que comezará no Cruceiro de Seixalbo e finalizará en Cudeiro Norte, cun dos tramos históricos da Vía da Prata.

A asistencia á Camiñada é libre e gratuíta, previa inscrición na web da organización. O percorrido atravesa a cidade de sur a norte, seguindo as pisadas dos peregrinos.

José Antonio Quintas Vázquez será o relator encargado de explicar aos asistentes a importancia histórica e artística dos lugares a visitar, entre eles, As Burgas, as rúas da zona vella, o Concello, a Catedral, o Paseo e a Ponte Romana.

As actividades proseguirán visitando tramos dos camiños de Santiago en Tui (12 de outubro), Lugo (20 de outubro), A Rúa (27 de outubro), Sarria e Portomarín (3 de novembro), Valga e Padrón (10 de novembro), Fisterra (17 de novembro), Chantada (24 de novembro) e A Coruña (1 de decembro).

A Camiñada deste sábado, na que colabora a Asociación de Amigos do Camiño Mozárabe-Vía da Prata partirá de Seixalbo ás 10,30 horas. Un autobús sairá ás 10,15 horas da Alameda de Ourense para os que queiran desprazarse dende alí até a saída.

Finalizada a Camiñada haberá unha comida en Cudeiro. A participación na ruta é gratuíta, a comida corre por conta de cada un dos comensais e é preciso confirmar asistencia.