Por Galicia Confidencial | Compostela | 11/10/2018 | Actualizada ás 14:02
Os grupos da oposición na Cámara galega criticaron a falta de medidas de impulso social nas propostas presentadas polo PP neste novo curso político, ademais de criticar a falla de vontade para apoiar as súas, principalmente, as de En Marea e do BNG.
Precisamente, o viceportavoz parlamentario de En Marea, Antón Sánchez, advertiu que, "a realidade" que se observa en Galicia "non é allea ás políticas de Feijóo". Por exemplo, incidiu en que a comunidade rexistra "a peor evolución" de todas as autonomías en relación ao emprego.
A continuación, advertiu que falar de "impostos cero no rural" é "rirse da xente" e resulta "indignante". Fronte á xestión popular, o parlamentario de En Marea reivindicou as medidas que propón a formación rupturista, con especial fincapé en cuestións da área social, ligadas con garantir o dereito á vivenda e unha aposta "real" pola atención á dependencia.
PSOE
Pola súa banda, a viceportavoz parlamentaria do PSdeG, Patricia Vilán, reivindicou a postura de diálogo do Partido Socialista, formación que asegurou que está "no 91%" dos acordos alcanzados durante o Debate do Estado de Autonomía.
Con todo, na súa comparecencia volveu a cualificar ao presidente da Xunta, Alberto Núñez Feijóo, de "vendedor de fume" e criticou que a reforma do Goberno galego só servise para que dous conselleiros compitan nas municipais e para que a extitular de Medio Rural e agora responsable de Medio Ambiente, Ángeles Vázquez, "non se chamuscase aínda máis" despois da súa "xestión nefasta" da vaga de incendios de outubro de 2017.
BNG
Finalmente, a viceportavoz parlamentaria do BNG, Olalla Rodil, reivindicou as propostas impulsadas polo grupo nacionalista no marco do Debate sobre o Estado da Autonomía, que finaliza este xoves, e lamentou que os populares vaian aplicar "o 'rodillo'" renunciando a "ferramentas" que servirían para "mellorar" a situación da comunidade.
Rodil reivindicou que as 40 propostas de resolución impulsadas polos nacionalistas pretenden infundir "confianza" e expor cuestións que "nunca antes" se puxeron sobre a mesa. "Querémolo todo e estamos fartos de esperar", proclamou, antes de reivindicar que o BNG quere dar a Galicia "máis poder económico e político", así como proporcionar "as mellores ferramentas" para poder "mellorar" a vida dos galegos. "Imaxínase un Goberno que podendo ter estas ferramentas diga que non?", preguntouse.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.