As mulleres e a música, no centro da segunda edición de Acreativa

As mulleres e a música serán o centro da segunda edición de Acreativa, un proxecto que ten como obxectivo mostrar as novas tendencias e vangardas culturais a través de diferentes experiencias creativa. Nesta edición o foco centrarase na música como fío condutor pola súa ampla capacidade para ramificarse e influenciar outras escenas, e as mulleres e o seu papel na industria musical terán un espazo relevante, xa que o 80% das actividades que se desenvolverán no marco de Acreativa estarán protagonizadas por artistas femininas.

A primeira actividade terá lugar o vindeiro mércores 17 de outubro, ás 20.30 h, no marco de Acreativa Talks, un espazo para charlas e mesas redondas combinadas con música. Ese día celebrarase o I Encontro da Asociación de Mulleres da Industria da Música de Galicia (MIM) no que se traballará sobre os diferentes proxectos que esta asociación puxo en marcha en Galicia para promover, mediante actividades e eventos, a igualdade de xénero na industria da música. Intervirán como relatores a presidenta de MIM, Carmen Zapata, e a vogal da asociación Patricia Hermida. 

Posteriormente ao encontro, a partir das 21.30 h celebrarase un DJ Set co grupo Agoraphobia, conxunto boirense de indi garage rock conformado por catro mozas. Foron gañadoras do VodafoneYu Music Talent, o que lles permitiu xirar por toda España con artistas como Russian Red ou The Zombie Kids. 

Acreativa está organizado por Afundación, a Obra Social de ABANCA, na súa sede da Coruña. A invitación para asistir a esta actividade pódese descargar na web Ataquilla.com.