O alcalde de Santiago obviará a polémica política na súa reunión con Feijóo

O alcalde de Santiago de Compostela, Martiño Noriega, será recibido este mércores polo presidente da Xunta, Alberto Núñez Feijóo, na última visita institucional entre ambos que se prevé para o que resta de mandato local. O último encontro tivo lugar o 3 de marzo de 2017, despois das eleccións autonómicas de 2016.

Na véspera ao encontro, e a preguntas dos medios, Noriega considerou que o "clima político debe de quedar fóra das relacións institucionais". Pola contra, indicou que centrará os temas que leva á reunión nas infraestruturas, incluída a nova EDAR.

Así, fixou a axenda na necesidade de "facer seguimento" dos proxectos nos que están a colaborar as dúas administracións nas súas respectivas competencias, por exemplo a conectividad entre a AP-9 e a Cidade da Cultura, a variante de Aradas ou a intermodal, cuxa licitación "empezou agora".

Pero a listaxe inicial de cuestións abarca desde a residencia para maiores nos terreos de Fontiñas (sobre o que se asinou recentemente un convenio coa Xunta), até a construción de aparcadoiros e unha zona deportiva en San Lázaro. Ademais, Noriega ten previsto expor o financiamento da capitalidade e equipamentos, que inclúe o cambio de posicionamento do Goberno central sobre a depuradora (ampliar a actual da Silvouta).

Na misiva enviada polo rexedor compostelán a Feijóo, na súa petición de reunión, tamén propuxo tratar asuntos como as políticas sociais e de saúde e actuacións de emprego e gobernanza do turismo, coa mirada posta no Xacobeo 2021.

CLIMA POLÍTICO

Preguntado pola situación política, Martiño Noriega considerou que "o clima político non pode condicionar as relacións institucionais". "Estamos obrigados a aparcar as posicións partidarias ou electorais e dar exemplo do normal funcionamento das institucións", considerou.

O rexedor compostelán advertiu de que "non se pode estar cunha campaña electoral dun ano de duración" e insistiu en que, no caso de Compostela, á Xunta e ao Concello "tócalles a cohabitación e a corresponsabilidade coa cidade".

Noriega quixo separar a situación política. "Hai grandes debates da cidade que levaban anos encima da mesa e que agora son realidades (variante de Aradas, ampliación AP-9...). Nas cuestións concretas podemos estar satisfeitos nas cousas que fomos desbloqueando", apuntou.

Dito isto, sinalou que, sobre as cuestións "máis subxectivas", lévaas con "deportividade". Referiuse ao feito de que a Xunta non "convidou" o rexedor "a actos que protocolariamente ten que ser convidado como a toma de posesión de conselleiros" ou que o alcalde "desaparecese dos actos de recepción ao peregrino 300.000", como ocorreu no acto deste martes.

"Mentres podamos blindar as infraestruturas, que é o importante, o outro queda para palacio e, no palacio, moitas veces estamos quen non queremos esta. Non ten ningún interese máis aló das relacións que poida haber protocolarias; quedo co importante", resolveu Noriega.