O 60% de herdanzas entre irmáns quedan libres de Imposto de Sucesións e revértese a alza de Patrimonio
A Xunta tamén rebaixa os impostos para mercar unha vivenda usada para residencia habitual.
Por E.P. | SANTIAGO DE COMPOSTELA | 18/10/2018 | Actualizada ás 15:50
Os orzamentos galegos para 2019, que foron aprobados este xoves polo Executivo que dirixe Alberto Núñez Feijóo e esgotan o teito de gasto de 9.850 millóns de euros como se avanzou, irán acompañados de catro novas rebaixas fiscais. Así o plasmará a lei de acompañamento das contas, segundo ratificaron Feijóo e o conselleiro de Facenda, Valeriano Martínez.
Entre os novos beneficios fiscais, está a rebaixa do Imposto de Sucesións para todas as herdanzas entre irmáns. A redución duplícase ao pasar de 8.000 a 16.000 euros. Deste xeito, seis de cada dez herdanzas entre irmáns (o 60%) quedarán exentas de tributar e no 40% restante dos casos, pagarase "menos".
Así mesmo, o Executivo autonómico decidiu reverter a suba do Imposto de Patrimonio formalizada en 2013. Feijóo xustificou que se subiu nun escenario de crise e agora óptase por eliminar ese incremento por cento da tarifa, polo que se retorna á que actualmente está vixente no Estado e que aplicaba o bipartito.
Na liña do avanzado polo presidente no Debate sobre o Estado da Autonomía, a Xunta tamén rebaixa os impostos para mercar unha vivenda usada para residencia habitual.
No caso da compra de vivenda habitual, a rebaixa será do 25% nos impostos para menores de 36 anos, familias numerosas ou persoas con discapacidade, que serán "os que menos paguen en España". Ao tempo, materialízase un 12,5% de rebaixa xeral nos impostos para galegos cun límite de patrimonio. En total, 10.000 familias galegas verán cada ano rebaixados os seus impostos a este ámbito.
En cuarto lugar, a aposta pola innovación quedará reflectida no incentivo da participación e investimento en pemes innovadoras e iniciativas empresariais de base tecnolóxica. Igualmente, no caso das doazóns para investigación, aumentarán as porcentaxes e límites das deducións no IRPF.
Sen saír do ámbito fiscal, a Xunta remarcou que manterá as rebaixas aprobadas desde que Feijóo se puxo á fronte do Executivo autonómico e que permitiron un aforro en impostos de "1.100 millóns de euros". O presidente contrapuxo as rebaixas fiscais, a redución do déficit e da débeda coas, ao seu xuízo, "tres equivocadas decisións" adoptadas en sentido contrario por parte do Goberno de Pedro Sánchez.
