Feijóo non ve "acoso inmobiliario" en Ourense e di que só se quería "recuperar un ben da comunidade"

Manifestouno cando lle preguntaron polo feito de que o fiscal xefe de Ourense, Florentino Delgado, interpuxese unha querela contra a secretaria xeral técnica e de Patrimonio da Consellería de Facenda, M.P.S.M.H. --no cargo desde 2012--, e contra o subdirector de Patrimonio da mesma Consellería, P.J.M.P. --no cargo desde 1998-- por un suposto delito de coaccións inmobiliarias no edificio da antiga Cámara da Propiedade Urbana de Ourense, situada na Avenida da Habana e de titularidade da Xunta de Galicia.

Segundo sinala o representante do Ministerio Público no escrito, ambos os querellados, ante a situación de que o edificio xa sinalado "era só ocupado como arrendatarios" por dúas persoas --unha muller de avanzada idade e un home--, "entenderon que a Xunta había de recuperar a plena posesión" do mesmo "lanzando" aos inquilinos a través de "resortes legais" e "medidas de presión non lexítimas".

"Imos colaborar e estamos a disposición de calquera órgano xurisdiccional en Galicia, porque non pode ser doutro xeito; pero non se trata de recuperar un inmoble para altos cargos, senón para o patrimonio da comunidade, que é ben distinto. O subdirector de Patrimonio e a secretaria xeral tratan de recuperar un inmoble que entendemos que temos dereito a recuperar", defendeu.

Así mesmo, Feijóo sinalou tamén que "si hai servizo de limpeza e págase co diñeiro dos galegos". "E sobre o de que non había elevador, foi pechado pola empresa de inspección porque o clausurou; quixémolo contratar e reparar, e porase en marcha nos próximos días", dixo. Dito isto, reafirmouse en que os empregados públicos "traballan para recuperar un ben da comunidade e merecen un respecto".

"POR SUPOSTO QUE OS VOU DEFENDER"

Ante a insistencia dos xornalistas, sinalou que el non sabía que había un expediente sobre este asunto e esgrimiu que non é posible que el ou o conselleiro de Facenda, Valeriano Martínez, presente na rolda de prensa posterior á aprobación dos orzamentos de 2019, coñezan directamente cada expediente de recuperación de propiedade que se abre na Xunta.

"Pero coñezo aos funcionarios, traballei en Patrimonio da comunidade e sei perfectamente que os funcionarios da hoxe Secretaría Xeral Técnica teñen absoluto rigor nas súas decisións e son honorables. Por suposto que os vou a defender, porque non me parece aceptable que se diga que queren cometer delitos", advertiu. Finalmente, concluíu que el non sabe se a Administración puido "equivocarse en algo". "Rectificaremos se foi así, pero non houbo máis intencionalidade que recuperar un ben da comunidade", reafirmouse.