Por Galicia Confidencial | Neda | 24/10/2018 | Actualizada ás 17:27
Os feitos sucederon o pasado mes de xuño na véspera de San Xoán, cando unha veciña de Neda acudiu ao concello solicitar permiso para unha fogueira. Contactou primeiramente por teléfono, que ten o contestador automático para atender ofrecendo a posibilidade de facelo en galego. Máis adiante, por motivos do mesmo permiso, foi persoalmente ás dependencias municipais.
“Alí preguntóulles se podían atendela en galego, os funcionarios dixeron que non tiñan por que atendela en galego” din desde MoveNeda, unha candidatura veciñal que fixo eco do caso. “O caso é que buscamos na lei e non existe a obriga de empregar o galego na administración”. Non obstante, Galicia Confidencial consultou á Mesa pola Normalización Lingüística, que apunta na lei de Normalización Lingüística ao Título II, no seu artigo 4.1. “O galego, como lingua propia de Galicia, é lingua oficial das institucións da Comunidade Autónoma, da súa Administración, da Administración Local e das Entidades Públicas dependentes da Comunidade Autónoma”.
Cando a veciña insistiu para ser atendida en galego, “terciou a tenente de alcalde, Ana Rosa Pena, que se presentou como avogada e contestou que os funcionarios non tiñan obriga legal de atendela en galego” din de MoveNeda. A veciña de Neda presentou un escrito por Rexistro no mes de xuño sobre este feito. Desde ese momento non houbo resposta por parte do Concello. “Este luns pasado día 22 de outubro, esta veciña presentouse no pleno e cando tocou rogos e preguntas, expuxo ao alcalde o que lle acontecera”.
O pleno foi gravado e subido á canle de Youtube de MoveNeda. Nos últimos minutos (1:25:30) pode escoitarse como a veciña si expón o que lle acontecera. A resposta do alcalde, “para nós moi correcta” din desde a candidatura veciñal, foi que el non tiña coñcemento do escrito nin do caso, e que lle pedía desculpas sobre o acontecido. MoveNeda indica ademais: “Non nos explicamos como non lle chegou, pero entendemos que todos os escritos non teñen por que chegarlle ao alcalde”.
MoveNeda suliñou que o escrito debera ter chegado ao concelleiro ou concelleira que leva a área de Normalización Lingüística, pero segundo fontes municipais non existe área de Normalización Lingüística neste concello e, por iso, din non lle chegou ningún escrito a ningún concelleiro.
Neste concello coruñés goberna un tripartito PSOE, BNG e Converxencia Galega (CG). O alcalde recoñece que o concello si ten que atender en galego se se lle pide. Logo das palabras do rexedor, síntese a voz da tenente de alcalde, que acousou á veciña de mentir. A isto a veciña respondeu que que sucedería se o acontecido estivese gravado, comentario que foi contestado pola tenente de alcalde pedindo que sacase a gravación. En ningún momento do suceso se poden ver os rostros das dúas persoas protagonistas do incidente.
Galicia Confidencial contactou coa tentente de alcalde de Neda, Ana Rosa Pena. Ás preguntas sobre o acontecido no pleno do 22 de outubro, Pena responde “o que dixen nese pleno está recollido nas actas, sinceramente é un tema que non me merece ningún comentario, o único que vou dicir é que nin a esa señora nin a ninguén lle vou permitir que veña a un pleno calumniar, pero non me merece ningún comentario, sinceramente”.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.