Por Galicia Confidencial | A Coruña | 29/10/2018 | Actualizada ás 13:14
Acreativa Screen encherá A Coruña de creacións audiovisuais e experimentacións musicais. Será o vindeiro 9 de novembro dentro da última das tres cápsulas que conforman o festival de novas tendencias e vangardas culturais Acreativa, organizado por Afundación, a Obra Social de ABANCA.
Acreativa Screen é un punto de encontro entre o audiovisual e a música, un espazo para o cinema, os documentais e proxeccións audiovisuais influenciadas ou conceptualizadas desde a experiencia musical. As entradas para estas propostas pódense adquirir na web Ataquilla.com.
A primeira actividade no marco desta cápsula será o 9 de novembro coa presentación, a cargo de Fernando Vacas e Soleá Morente, do documental Omega sobre o disco de flamenco-rock do mesmo nome de Enrique Morente xunto ao grupo Lagartija Nick. Un traballo revolucionario no que Morente adaptou temas de Leonard Cohen e puxo música a poemas de Federico García-Lorca. Será a partir das 20.00 h.
Despois da proxección, ás 22.00 h, Soleá Morente e Napoleón Solo ofrecerán un concerto no que presentarán o seu disco OleLorelei, un traballo que combina diferentes estilos, viaxando desde o funk con aires de Serge Gainsbourg e Jane Birkin, ao setenteiro R&B ou o trap, atopando sempre novas rutas ao flamenco.
A seguinte proposta será o 10 de novembro con «Cinemix», proxecto audiovisual no que músicos desenvolven unha nova banda sonora para unha película e interprétana en directo mentres se proxecta en pantalla. Nesta ocasión a película será The Hill e a actuación correrá a cargo do dúo experimental Elle Belga.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.