Por E.P. | SANTIAGO DE COMPOSTELA | 26/10/2018 | Actualizada ás 15:19
A portavoz do BNG, Ana Pontón, criticou con dureza ao PSOE pola subida de peaxes da Autoestrada do Atlántico (AP-9) aprobada polo Goberno central, que ve "unha nova tomadura de pelo" aos galegos e "un auténtico despropósito" tendo en conta que afecta á comunidade cos salarios "máis baixos". En declaracións aos medios, tras participar nun acto para reclamar a gratuidade da AP-9 entre Santiago e Padrón, Pontón advertiu que se trata de "unha noticia pésima".
A dirixente nacionalista ironizou con que non sabe que pasa na Moncloa que, "cando senta un novo presidente, fai o contrario do que dicía que ía facer cando estaba na oposición", e apuntou directamente "ao PSOE de Pedro Sánchez e de Gonzalo Caballero". E é que, incidiu, agora fan o que "criticaban" cando dirixía o Executivo central Mariano Rajoy. Unha postura que tamén mantivo este xoves a Xunta que cargou directamente contra o PSOE.
Pontón recalcou que a AP-9 é unha infraestrutura "crave" e lamentou que "o Goberno de quenda", xa teña á fronte a PSOE ou PP --declarouse convencida de que ocorrería "o mesmo" con Podemos--, acabe "xogando para defender os intereses de Audasa e sableando os petos dos galegos".
En concreto, lembrou que o PSOE "antes" defendía que non se tiñan que compensar as ampliacións con cargo ás peaxes, senón que "tiña que ser o Estado o que se fixese cargo". "A nós válenos que se faga cargo o Estado ou que vaia á conta dos beneficios escandalosos de Audasa, o que non nos vale é que en Galicia teñamos as autoestradas máis caras de todo o Estado e Europa cos salarios máis baixo. Isto vai en contra dos cidadáns e das empresas", sentenciou.
AP-9 "LIBRE" DE PEAXES
Pontón lembrou que o BNG defende unha AP-9 "libre" de peaxes e remarcou que é preciso "conseguir o traspaso e apostar por unha autoestrada pública". Todo iso, co fin de "eliminar este atraco a man armada das peaxes".
En todo caso, apostou por "ir dando pasos" e avanzou que o Bloque levará ao Parlamento unha iniciativa para liberar de peaxe o tramo entre Santiago e Padrón, o que considera "unha medida lóxica e racional".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.