Son máis caros os xoguetes no Nadal?
Co Nadal á volta da esquina, cómpre saber cales son os agasallos para nenos que suporán un maior gasto e cando é a mellor época do ano para mercalos.
Por Galicia Confidencial | Santiago de Compostela | 07/11/2018 | Actualizada ás 12:47
Co Samaín vencido, o Nadal xa vai achegándose. En pouco máis de mes e medio comeza esa tempada do ano chea de luces, reencontros e agasallos. E, se falamos de agasallos, os xoguetes son os protagonistas indiscutibles desta categoría. Nun artigo de Idealo Magazín, analízase canto soben de prezo estes artigos no Nadal e cando poderiamos mercalos por unha cantidade inferior.
A demanda de xoguetes durante a tempada de Nadal aumenta ata situarse cinco veces por riba do valor normal. Boa parte do mercado destes produtos concéntrase nestas datas. Polo tanto, a oferta tamén medra considerablemente. Que pasa entón cos prezos?
OS PREZOS DISPÁRANSE
Aproveitando este aumento de demanda, o importe que debemos aboar por eses artigos increméntase de xeito notable moitas veces. A análise desenvolvida por idealo Magazín céntrase en cinco categorías: bonecas, LEGO, Playmobil, peluches e Barbies. Cales destes produtos se encarecen máis?
Se ben todos estes xoguetes son máis caros durante o Nadal que durante o resto do ano, as bonecas Barbie son as que encabezan esta suba de prezo. No mes de novembro -o máis caro da tempada-, os artigos de Barbie pasan a custar un 67,65% máis ca en abril -o mes máis barato-. Pola súa parte, os peluches e mailas bonecas ven o seu prezo incrementado nun 43,90% e un 37,84%, respectivamente. Os típicos xoguetes de LEGO ou os Playmobil achéganse a unha diferenza de prezo do 30%.
En termos monetarios, esa variación podería supoñer uns 80 euros de diferenza en función do mes no que mercásemos o xoguete.
Se a comparativa a facemos entre o mes máis caro do Nadal (novembro) e a media anual, o aumento de prezo sitúase no 10,02% para todas as categorías estudadas.
COMO PODEMOS AFORRAR?
O consello máis útil para aforrarmos coas compras navideñas é aquel que máis se repite: mercar con antelación. En base ao estudo da citada revista, os meses máis axeitados para adquirir xoguetes serían os abranguidos no período marzo-agosto.
Outra das técnicas recomendadas é a de comparar prezos: debemos estar atentos ás oscilacións de prezos en función da época do ano, pero tamén en función da canle de compra elixida.
