Por Galicia Confidencial | Bruxelas | 06/11/2018 | Actualizada ás 17:54
A eurodeputada galega Lídia Senra denunciou este martes na Comisión Europea (CE) o perigo ao que se están vendo sometidas por culpa da eucaliptización no concello da Laracha (A Coruña) especies como a Píntega Galega ou Rabilonga (Chioglossa lusitanica) e o Caracol de Quimper (Elona Quimperiana), que están protexidas polo Convenio de Berna relativo á Conservación da Vida Silvestre e do Medio Natural en Europa.
Senra rexistrou en Bruxelas un escrito dirixido á CE no que informa ao ente comunitario de que a pesar da protección da que gozan estas especies das que cada vez quedan menos exemplares na UE, a súa supervivencia estase vendo ameazada nos montes do lugar do Pazo, en Soandres, e no río Acheiro, todo no concello da Laracha da comarca de Bergantiños, debido á plantación de eucaliptos nesta zona e á intención de levar a cabo cortas de fragas de árbores autóctonas.
Neste sentido, Lídia Senra pregúntalle á CE se non cre que plantar eucaliptos e cortar fragas é incompatible coa conservación dos hábitats naturais da fauna e flora silvestres protexidos mencionados. Tamén lle pide que especifique que medidas están obrigados a tomar tanto o goberno municipal como a Xunta de Galicia e o Estado español para protexer estes lugares e estas especies.
Ademais, e tendo en conta que a previsión do Plan Forestal da Xunta no 1992 era dun máximo de 245.000 hectáreas de eucalipto para o 2032 e hoxe xa temos arredor de 500.000 hectáreas con eucaliptos na Galiza, a eurodeputada inquire á CE que opinión lle merece esta situación e que recomendacións fai para protexer as especies arbóreas autóctonas e evitar que continúe a eucaliptización da Galiza.
UNHA PROTECCIÓN REAL
“É fundamental protexer de verdade, non só no papel, os montes e as augas e as especies que viven nelas fronte aos intereses das industrias madereiras que están a acabar co patrimonio natural galego coa complicidade das Administracións que, ou ben miran para outro lado, ou permiten directamente que se arrase co noso medio rural”, apunta nun comunicado. Así, chama a todas as Administracións a levar a cabo medidas efectivas para protexer o rural e toda a vida que nel hai.
Así, lembra que xa son moitas as iniciativas que leva presentado a europarlamentaria en Bruxelas para denunciar a eucaliptización na Galiza. A maiores do escrito presentado en referencia á situación na Laracha, Senra ten reclamado en numerosas ocasións que se inclúa o eucalipto na lista de especies exóticas invasoras preocupantes para a Unión.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.