María Xesús Lama gaña o Premio Nacional de Ensaio cunha novidosa biografía de Rosalía de Castro

Hoxe, o Ministerio de Cultura e Deporte do Goberno de España outorgoulle o Premio Nacional de Ensaio a María Xesús Lama pola obra Rosalía de Castro. Cantos de liberdade e independencia (1837-1863) publicada en Galaxia o pasado 2017 O primeiro volume dunha novidosa e rigorosa biografía de Rosalía de Castro, valeulle hoxe o Premio Nacional de Ensaio a María Xesús Lama (Lugo 1964), profesora de Estudos Galegos na Universidade de Barcelona e editora da obra da poeta. Este primeiro volume, publicado por Galaxia o pasado febreiro de 2017, abrangue desde o nacemento da escritora ata 1863, ano da publicación de Cantares gallegos. A profesora Lama pescuda na vida de Rosalía de Castro en Madrid, nun tempo de ideais e de aprendizaxe para a mocidade que, na segunda metade do século XIX, decide intentar vivir da pluma. Cun enfoque novidoso e un pulo investigador que converte a lectura nunha pescuda apaixonante na vida da autora de Follas novas, este primeiro volume relata e analiza unha serie de feitos e momentos chave na infancia e na etapa de formación de Rosalía de Castro. Desvélase a orixe acomodada e urbana dunha rapaza que medra gozando do ocio e benestar da súa clase; desmóntase a teoría do trauma da orixe, xa que é unha nena querida e valorada pola súa familia, e aclárase de xeito incuestionable o asunto da paternidade. O xurado do Premio Nacional destacou que a obra de Lama contribúe «a revisar unha imaxe tópica de Rosalía de Castro ancorada nunha visión romántica e chorona, mostrando a unha escritora lúcida, independente e defensora da liberdade, a igualdade e a xustiza social». Deste xeito, María Xesús Lama convértese na cuarta muller en lograr o Premio na historia do galardón e na segunda autora galega, despois de que Justo Beramendi o lograse no 2011.

Por Galicia Confidencial | Compostela | 08/11/2018 | Actualizada ás 17:53

Comparte esta noticia