#DefendeAGalega: 25 venres de loito na Corporación Radio e Televisión de Galicia
O persoal da CRTVG mantén viva a loita e demanda por uns medios públicos libres e plurais, tras 25 semanas da campaña dos 'Venres negros'. Recompilamos 25 imaxes que resumen esta loita.
Por Galicia Confidencial | Santiago de Compostela | 09/11/2018 | Actualizada ás 13:45
25 venres negros, 25 semanas de prantos. Este é o tempo que levan os traballadores da Corporación Radio e Televisión de Galicia denunciando publicamente as inxerencias e presións políticas e a manipulación informativa. 25 venres de loito que comezaron, precisamente, un día 25, o de maio pasado.
"Nunca pensamos chegar ao #VenresNegro25CRTVG. Por nós, non fariamos o 26º. Pero nin ven, nin oen, nin senten", expresaron hoxe ous viúvos e viúvas da independencia informativa na TVG e Radio Galega.
Non son só redactores, tamén técnicos, cámaras, relacións públicas, rexedores, produtores... A familia da CRTVG, unida na dor deste loito pola liberdade e a pluralidade informativa, cada venres vestidos de negro. Nesa dor, son acompañados por unha amplísima franxa da sociedade galega, desde partidos políticos e sindicatos, até organizacións profesionais, artistas, escritores, músicos... e xente anónima.
Durante estes 25 venres negros, algunha das palabras das que máis falamos foron liberdade, independencia informativa e rigor. Aí vai a primeira remesa de apoios#VenresNegro25CRTVG#DefendeAGalega pic.twitter.com/hjOgfTp8c6
— DefendeAGalega (@DefendeAGalega) 9 de novembro de 2018
Pero tamén hai quen non quere nin miralos nin escoitalos, aqueles que rexen o país na Xunta, aos que envían unha clara mensaxe: "Para os que fan oídos xordos, seguimos loitando pola dignidade e a liberdade dos medios públicos galegos".
As súas demandas non teñen que ver só coa censura á que din e exhiben ser sometidos desde a bancada azul do Parlamento galego e os despachos de San Caetano; tamén ten que ver coa calidade: "Defendemos a profesionalidade, a veracidade e a independencia e non queremos renunciar á calidade da imaxe e o son". E co desmantelamento dos medios públicos e da información de proximidade: "Con máis motivos, cada venres que pasa tinguímonos de negro contra o peche das desconexions locais na Radio Galega, non queremos que nos sigan desmantelando".
Comezamos en maio e van xa 25 semanas (!) reivindicando que a CRTVG cumpra coa súa función de servizo público. Seguen sen escoitarnos. E aquí seguimos. Súmate ao #VenresNegro25CRTVG #DefendeAGalega pic.twitter.com/ZgdKH4sBUy
— DefendeAGalega (@DefendeAGalega) 8 de novembro de 2018
Durante estes 25 venres negros, algunhas das palabras que máis resoaron dentro e fóra da CRTVG foron liberdade, independencia informativa e rigor. Ninguén sabe cantos venres de loito máis quedan por diante, até desterrar e esquecer as inxerencias políticas nos medios públicos e conseguir, por fin, unha "Corporación sempre pública e plural", como demandan os traballadores.
"Seis meses despois, seguimos con máis forza para reivindicar o noso labor como o servizo público que somos para todos os galegos e galegas", reivindican hoxe, vixésimo quinto venres de loito na Corporación Radio e Televisión de Galicia.
Hoxe non é un aniversario de celebración, senón de máis loito e pranto pola liberdade informativa. E de recordo a 25 venres de loita.
25 IMAXES POLA LIBERDADE INFORMATIVA NOS MEDIOS PÚBLICOS
