Por Europa Press / Redacción | SANTIAGO DE COMPOSTELA | 17/11/2018 | Actualizada ás 15:39
Alumnos de centros educativos das Pontes, Melide, Vilalba, Pontevedra, Sanxenxo, Cangas do Morrazo, Santiago e Ribeira, foron premiados no concurso audiovisual organizado pola Xunta de Galicia con motivo do 25 N, o Día internacional contra a violencia de xénero. No certame participaron alumnos de 5º e 6º de Primaria, de Educación Secundaria Obrigatoria (ESO) e de Bacharelato, dun total de 50 centros educativos.
Ilustrando distintas imaxes contra os malos tratos, os estudantes plasmaron frases como 'Todas as persoas somos iguais pero hai xente que non o quere entender', 'No amor non hai ataduras', 'Non hai amor nos malos tratos' ou 'Acabemos coa tormenta, fagamos que salla o sol'.
En imaxe gráfica os primeiros premios recaeron no IES Moncho Valcarce das Pontes para a 1º categoría e no IES de Melide para a 2º. Os segundos premios de imaxe gráfica foron para CEIP Monseivane de Vilalba e o IES Sánchez Cantón de Pontevedra. No apartado de peza audiovisual os primeiros premios foron para o IES Vilalonga de Sanxenxo e para o IES María Soliño de Cangas do Morrazo. Os segundos premios de pezas audiovisuais foron gañados polo CEIP Santiago Apóstolo, de Santiago de Compostela e o Colexio Galaxia de Ribeira.
O concurso estaba dividido en dúas categorías, a primeira, para o alumnado de 5º e 6º de Primaria e 1º e 2º de Educación Secundaria Obrigatoria (ESO), e a 2ª para alumnado de 3ª e 4ª da ESO e 1º e 2º de Bacharelato. O xurado, composto polos integrantes da Comisión asesora da publicidade non sexista, a Secretaría Xeral de Igualdade, e a Consellería de Educación, fallou o venres os premios do concurso de imaxes gráficas e pezas audiovisuais, convocado pola Secretaría Xeral de Igualdade e pola Dirección Xeral de Educación, Formación Profesional e Innovación Educativa, con motivo do 25 de novembro.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.