Falece o presidente da Confederación de Empresarios de Ourense

José Manuel Pérez Canal, presidente da Confederación de Empresarios de Ourense e cogerente da empresa Aceites Abril, faleceu este sábado, como consecuencia da enfermidade que padecía.

A Xunta de Galicia, a través dun comunicado, expresou o seu pesar ante a perda de "un referente do mundo empresarial" de Galicia. "Exemplo de compromiso profesional e persoal coa súa terra, durante toda a súa traxectoria destacou pola súa visión, responsabilidade e entrega".

A Xunta enxalza o seu compromiso con Galicia que "se viu redobrado desde o ano 2013, cando asumiu a presidencia da Confederación de Empresarios de Ourense, un cargo desde o que traballou con perseveranza e dedicación para contribuír ao crecemento económico e social desta provincia e, por tanto, ao desenvolvemento de Galicia". "O seu legado debe servirnos como exemplo e espello no que se miren as futuras xeracións", agrega o goberno galego no seu comunicado.

PÉSAME DA CEG

Tamén a Confederación de Empresarios de Galicia (CEG) lamentou "profundamente o falecemento" de Pérez Canal e transmitiu o seu agarimo e apoio á súa familia e achegados. O tanatorio das Burgas, en Ourense, acollerá a partir das 17,00 horas a capela ardente do último presidente da CEO. O enterro terá lugar o domingo na intimidade familiar. O luns, ao cinco da tarde, celebrarase o funeral na igrexa parroquial de Santiago das Caldas en Ourense.

A CEG lembrou que Pérez Canal se incorporou desde moi nova á empresa familiar, Aceites Pérez Delgado, que na actualidade é  Aceites Abril. Após o falecemento do seu pai e como o maior de sete irmáns, asumiu as rendas da compañía.

Aínda que a empresa situábase orixinalmente na Rúa do Mercado, no Barrio da Ponte de Ourense, a mediados dos anos 80 trasladouse ao polígono de San Cibrao para iniciar unha fase de expansión, que alcanzou o seu grao máximo fai cinco anos coa ampliación das instalacións e a multiplicación exponencial da súa capacidade. A CEG defíneo como "un defensor sen concesións da internacionalización empresarial", que conseguiu "a implantación da compañía familiar nos cinco continentes".

PESAR DO PRESIDENTE DA XUNTA

O presidente da Xunta de Galicia, Alberto Núñez Feijóo, lamentou "profundamente" o falecemento este sábado do presidente da Confederación de Empresarios de Ourense. En declaracións aos medios de comunicación tras participar nun acto do PPdeG en Ourense, onde Feijóo reivindicou que se trataba "dunha boa persona, un gran empresario e un ourensán que defendía a Ourense en calquera foro, circunstancia ou en calquera ocasión".

"Lamento profundamente porque o coñecía moi ben, levabamos tempo traballando desde a organización de empresarios el e desde a Xunta eu", agregou o titular do goberno galego, que tamén quixo pór en valor a empresa Aceites Abril, non só por ser "unha marca de aceites que se identifica con toda Galicia" senón tamén por ser "unha marca de compromiso con Galicia, de compromiso co emprego, de compromiso co investimento" e que reflicte o que fan "os empresarios que queren a Galicia". Tras enviar un abrazo á muller, fillos, nai e irmáns do empresario falecido debido á enfermidade que padecía, asegurou que aínda que "non vai ser fácil substituílo", "o importante é mantelo na memoria". "Creo que o noso amigo Canal vai estar na nosa memoria mentres vivamos, porque é unha persona que se identificaba co que nos gusta ser, unha persoa de palabra, traballadora, que non lle gustaba aparentar, que lle gustaba traballar e construír, e Ourense estaba permanentemente dentro das súas prioridades e propostas", concluíu o presidente da Xunta de Galicia.