Sobe o número de estranxeiros afiliados á Seguridade Social respecto ao 2017
En Galicia, máis do 40% desas persoas proceden de países da Unión Europea. Por sectores, destaca o número de estranxeiros na área de hostalaría.
Por E.P. | SANTIAGO DE COMPOSTELA | 20/11/2018 | Actualizada ás 12:27
O número medio de afiliados estranxeiros á Seguridade Social en Galicia alcanzou os 36.607 no mes de outubro, o que significa un crecemento interanual do 10,56%. En toda España, a media situouse en 2.010.634 persoas.
Do total, 28.895 correspóndense co réxime xeral -dos cales 24.312 pertencen ao xeral, 1.399 ao agrario e 3.184 ao servizo do fogar-. Ademais, 6.332 son autónomos e 1.381 persoas pertencen ao sector do mar.
Se analizamos a súa procedencia, dos 28.895 estranxeiros da Seguridade Social, 12.742 son da Unión Europea e 16.153 doutros países de fóra. Pola súa banda, dos 6.332 autónomos, 2.784 son da Unión Europea e 3.548 doutras orixes.
En total, dos 36.607 estranxeiros que de media estiveron afiliados na Seguridade Social en outubro, 15.716 procedían dalgún dos países da Unión Europea e 20.892 doutros países.
Por sectores, a hostalaría acolle o maior número de estranxeiros anotados na Seguridade Social, cun total de 5.890 persoas (20,38%); seguido do réxime especial do fogar, con 3.184 anotados (11,02%). Séguenlle a industria da manufactura, con 3.123 persoas (10,81%) e o comercio, con 3.110 estranxeiros afiliados (10,76%).
