Teatro para que os nenos aprendan a comer ben

Eu cociño, ti cociñas?. Esta nova montaxe de Mamá Cabra é unha proposta anovadora, onde a cociña e a alimentación saudable se converten no medio perfecto para traballar novos aspectos curriculares dos máis novos. 

Afundación, a Obra Social de ABANCA, acollerá o vindeiro venres 23 de novembro, en dúas funcións ás 10.00 e ás 12.00 horas, a representación da nova proposta teatral de Mamá Cabra, Eu cociño, ti cociñas?. A Sede Afundación A Coruña contará coa asistencia de máis de 500 escolares procedentes de 57 centros escolares da cidade herculina e arredores. 

Timoteo cambiou o seu quiosco por un restaurante que se chama COKI, xa que estaba preocupado porque os nenos e nenas comesen de maneira saudable. Mesmo fixo un blog para dar a coñecer as súas receitas con ingredientes moi especiais porque di que cociñando pódese percorrer o mundo e facer novas amizades. 

Con esta nova proposta, Afundación desenvolve unha actividade na que se fai fincapé na boa alimentación e na que a gastronomía se presenta como unha canle máis de transmisión cultural. Foméntase, desta forma, a conxunción dunha proposta de carácter lúdico cun consistente fondo didáctico, en consonancia cos principios que marcan as actividades para escolares de Afundación.