O xuíz Andrés Lago toma posesión este venres como decano de Santiago

O xuíz Andrés Lago Louro toma posesión este venres como decano de Santiago, ás 13,00 horas na biblioteca do edificio xudicial de Fontiñas, na capital galega.

Titular do xulgado de instrución número 3 de Santiago, Lago Louro substituíu a Luís Aláez en xuño de 2014, co que se puxo á fronte, entre outros casos, da investigación do accidente do tren Alvia ocorrido en Angrois (Santiago) en xullo de 2013 e no que morreron 80 persoas.

Desde a súa chegada a Santiago, no maxistrado recaeron ademais outros casos mediáticos, como o que investigou a posible retención de monxas Mercedarias nun convento da cidade, finalmente arquivado, ou a causa pola subministración dos novos fármacos contra a hepatite C, na que están investigados dous altos cargos do Sergas.

Após ingresar na carreira xudicial en 2004, ocupou os xulgados de primeira instancia e instrución número 1 de Cistierna (León) e número 2 de Corcubión (A Coruña). Neste último levou a coñecida como 'Operación Orquestra', que investigou unha trama de corrupción, destapada nun proceso por narcotráfico.

No marco desa operación foron detidos o por entón alcalde de Cee Ramón Vigo, así como o rexedor de Fisterra, José Manuel Traba, e o de Mazaricos, José Manuel Santos.