Caballero asegura que o gañador das primarias na Coruña "contará co respaldo da dirección do PSdeG"

O secretario xeral do PSdeG, Gonzalo Caballero, asegurou que o gañador do proceso de primarias para elixir candidato socialista á Alcaldía da Coruña "contará co respaldo da dirección" do partido en Galicia, xa que os militantes escollerán "ao mellor" entre José Manuel García e Inés Rey.

Así o expresou o xefe de filas do PSdeG en declaracións aos medios na presentación do candidato socialista en Silleda (Pontevedra), o xa rexedor Manuel Cuíña, quen buscará revalidar a súa maioría absoluta nos próximos comicios locais de maio.

Neste contexto, preguntado sobre o proceso de elección de cabezas de lista nas sete cidades que se pecha este domingo na Coruña, Caballero reivindicou que "o que lle preocupa é ter aos mellores candidatos", para o que lle dan "participación" ás bases: "Aquilo que os militantes decidan contará co respaldo do PSdeG e de todos os socialistas galegos".

Con este proceso, o PSdeG busca erixirse nunha "alternativa de cambio" que consolide as alcaldías naqueles concellos onde xa gobernan e "alcanzar máis" noutros lugares "onde o PP non é capaz de ter novas políticas municipais e onde as 'mareas' teñen problemas e deficiencias na xestión".

Tras iso, vaticinou que os actuais rexedores de Vigo e Lugo, Abel Caballero e Lara Méndez, "repetirán o seu respaldo maioritario", á vez que se mostrou seguro de que os socialistas "volverán alcanzar a maioría absoluta" en Silleda e un resultado "máis forte" na Deputación de Pontevedra, da que está á fronte Carmela Silva.

"O PSdeG está a encarar con vitalidade e forza as próximas eleccións municipais. Estamos a facelo en toda Galicia designando xa aos sete candidatos nas cidades grandes", resumiu.

DEDICACIÓN A SILLEDA "24 HORAS AO DÍA"

Sobre o rexedor silledense, Caballero destacou a súa "capacidade de traballo" e a súa dedicación ao municipio "24 horas ao día". Así, marcou o obxectivo de "manter a senda de progreso" neste concello, que conta cun "dos grandes alcaldes" do PSOE.

Neste contexto, o propio Cuíña afirmou que a súa "boa xestión económica" permitiu, tal e como asegurou, que Silleda pasase de ter, "durante máis de 20 anos, a auga máis cara da comarca, a ter hoxe a máis barata".

"Esperamos que pase este tempo até maio o máis tranquilo posible, porque empezan as cousas a ir por uns camiños que non nos gustan moito", declarou, en relación á actualidade política.

CUÍÑA REPRESENTA "O MELLOR DA CONDICIÓN HUMANA"

Pola súa banda, a presidenta da Deputación de Pontevedra, Carmela Silva, advertiu que "non se pode consentir" a desigualdade nin entre territorios nin entre xéneros. "E somos o único partido que aprobou leis para alcanzar os dereitos que nos corresponden ás mulleres", apuntou con motivo do Día Internacional para a Eliminación da Violencia contra as Mulleres.

Así mesmo, a dirixente provincial subliñou o "compromiso" de Manuel Cuíña co seu municipio porque "representa o mellor da condición humana". A continuación, prognosticou que "Gonzalo (Caballero) vai ser o próximo presidente da Xunta porque é unha persona que cre no seu pobo".

No acto tamén interveu o secretario provincial do PSdeG en Pontevedra, David Regades, quen fixo fincapé en que os socialistas teñen "outra forma de gobernar", coa lupa posta na Deputación dirixida por Silva. Así, e en vista da "dignidade" que deu Pedro Sánchez ao Executivo central, Regades vaticinou que o PSOE será a "primeira forza" nas municipais de toda España, en Pontevedra e, de novo, en Silleda.