Unha operación contra o tráfico de drogas na Coruña acaba con oito detidos
Dous dos detidos son un matrimonio que dirixía un prostíbulo onde tamén vendían cocaína de diferentes calidades.
Por Europa Press / Redacción | A CORUÑA | 26/11/2018 | Actualizada ás 17:42
A Policía Nacional detivo a un matrimonio que dirixía un prostíbulo e a outras seis persoas máis nun operativo por tráfico de drogas na Coruña e a súa área metropolitana, segundo informa a Xefatura Superior de Policía de Galicia.
A investigación iniciouse hai varios meses cando os axentes pertencentes ao Grupo de Estupefacientes da Brigada Provincial de Policía Xudicial da Coruña centraron as súas pescudas nun matrimonio que rexentaba un prostíbulo. Os axentes comprobaron que o home, ao longo do día, vendía cocaína no barrio das Conchiñas. Ao chegar a noite, durante as horas de apertura do prostíbulo, era a muller a que vendía no establecemento a clientes que llo demandaban, así como a persoas que se achegaban a comprar.
No transcurso da investigación, os policías detectaron que o home preparaba a cocaína para a venda con dúas calidades diferentes que ofertaba aos seus compradores, unha con maior porcentaxe de riqueza e outra cunha menor porcentaxe, variando o prezo. Tamén no curso da investigación os axentes identificaron á persona que fornecía a cocaína aos donos do prostíbulo, o cal lle facía chegar periodicamente grandes cantidades desta droga. Ao servizo do subministrador estaban dous homes, os cales realizaban labores de custodia, transporte e preparación da droga para a súa posterior venda.
TRES FASES
A operación realizouse en tres fases. En concreto, o pasado 11 de novembro procedeuse á detención de catro acodes. Os arrestos tiveron lugar cando o subministrador dos donos do prostíbulo e un dos seus axudantes estaban a levar a cabo a compra dunha importante cantidade de cocaína a outros dous homes residentes na localidade de Coirós. No operativo para levar a cabo estas detencións participou o Grupo de Operacións Especiais de Seguridade (GOES) da Xefatura Superior de Policía de Galicia, "dada o perigo dos suxeitos".
O pasado 14 de novembro practicáronse outro tres detencións: os donos do prostíbulo e outro home máis, relacionado cos anteriores e que vendía MDMA, cocaína e viagras no barrio da Sacra Familia. A última detención produciuse o xoves 15 de novembro e foi a do segundo axudante do subministrador dos donos do prostíbulo. Este home cortaba a droga no interior dunha caravana que tiña escondida nun galpón dunha leira familiar. Nela, interveuse tamén unha pistola, que posuía de maneira ilegal. Por este motivo, atribúeselle tamén un delito de tenencia ilícita de armas.
DROGA INCAUTADA
No transcurso da investigación, realizáronse cinco rexistros domiciliarios e outro máis no prostíbulo. Os axentes incautaron 1,6 quilogramos de cocaína, 6 quilogramos de haxix, unha pistola de calibre 9 milímetros, unha pistola detonadora, unha escopeta de aire comprimido e máis de 200.000 euros. Dos 1.600 gramos de cocaína intervidos, 600 gramos xa estaban embolsados en papelinas dun gramo preparadas para a súa venda. Aproximadamente 300 gramos eran de maior calidade e o resto de menor, papelinas que eran diferenciabas por cores.
Froito da operación, a Policía Nacional desmantelou puntos de venda de droga no barrio das Conchiñas e no barrio da Sacra Familia, así como nas localidades da provincia, como Alvedro, Betanzos, Oleiros e Coirós. En total detívose a oito persoas, sete homes e unha muller, como presuntos autores dun delito de tráfico de drogas. Sete deles carecían de antecedentes policiais. Após finalizar as dilixencias, sete dos arrestados foron postos a disposición xudicial, que decretou o ingreso en prisión provisional de todos eles. A investigación estivo tutelada polo Xulgado de Instrución número sete da Coruña.
