Un incendio en dúas locomotoras interrompe a circulación ferroviaria en Ribadavia
Un incendio rexistrado en dúas locomotoras en Ribadavia (Ourense) obrigou a cortar na mañá deste martes a circulación ferroviaria neste tramo da liña Ourense-Vigo.
Por Galicia Confidencial | Ribadavia | 27/11/2018 | Actualizada ás 10:23
Segundo a información do CIAE 112-Galicia, foi o persoal de Adif o que deu a voz de alarma ao redor das 7,30 horas, indicando que se rexistrou un incendio no quilómetro 74,3 da liña Ourense-Vigo, concretamente no tramo Ribadavia-Filgueira.
Até a zona desprazáronse efectivos dos Bombeiros do Carballiño e do GES de Ribadavia, que traballan para extinguir as chamas. Tamén foi alertada a Garda Civil e o 061, aínda que finalmente non hai persoas afectadas.
Para os labores de extinción foi necesario cortar a electricidade das vías férreas e a circulación de trens neste punto, polo que Adif estableceu un plan alternativo de transporte por estrada para os viaxeiros afectados.
