Ánxeles Cuña emprega o mesmo argumento que os deputados de Podemos para non pagar a En Marea

A deputada de En Marea Ánxeles Cuña defendeu que neste 2018 "aprazou" a súa contribución á organización rupturista ante a falta de "transparencia" na xestión económica e tachou de información "nesgada" e de "erro" o comunicado da coordinadora do partido no que se daba a coñecer que algúns dos seus deputados parlamentarios non estaban a cumprir coas súas obrigacións financeiras.

"Non entendo por que se dá unha noticia nesgada", denunciou. "Eu se hai transparencia seguirei doando a En Marea, se non a hai, é lexítimo dicir que fago unha doazón a calquera asociación ou fundación sen ánimo de lucro e que cumpra os seus obxectivos sociais", engadiu.

En declaracións aos medios de comunicación convocadas por En Marea, Ánxeles Cuña quixo así "desmentir" informacións que considera "claramente falsas" e que proceden do comunicado que a coordinadora da formación remitiu esta semana, en pleno período de campaña electoral interna á súa Consello.

Nese comunicado, sinalouse que os deputados autonómicos de Podemos e Esquerda Unida, excepto Manuel Lago, incumprían coa obrigación da carta financeira, que contempla que deben destinar á formación o 50% das cantidades que están obrigados a doar do seu soldo. Tamén se incluiría entre os 'debedores' á independente Ánxeles Cuña.Pero a deputada remarcou que "de incumprimento nada", porque o ano "termina dentro dun mes" e cumprirá como fixo desde "o minuto cero" no caso de que as contas de En Marea sexan "transparentes".

DATOS

Para apoiar a súa afirmación, achegou datos. En 2016 contribuíu con 1.810 euros correspondentes ao tres meses que estivo de deputada, aínda que non dispuña do certificado por non solicitalo. En canto a 2017, indicou, con certificado en man, que as súas achegas ascenderon a 5.040 euros. E a estas cantidades sumaríanse as "cantidades considerables" destinadas a "cinco ou seis ONG".

Con todo, xustificou que en 2018 "aprazou a doazón por un motivo de transparencia". "Pedín contas de onde se destinaban as doazóns, remitíuseme á páxina onde hai perdas e ganancias de En Marea, é un documento de balance contable que non especifica nada, non ten valor intrínseco ningún, por tanto, eu continuo esperando a que desde En Marea se faga a desagregación de onde se dirixen as doazóns, porque son finalistas, teñen un obxectivo concreto, non son para calquera cousa", subliñou.

Ánxeles Cuña defendeu a súa "honorabilidade e honestidade", pero tamén a dos sete deputados de En Marea acusados de non pagar á formación. "Eu creo que están a cumprir absolutamente", asegurou.

E a pesar de afirmar que non ía entrar " en batalla política", a un día do inicio do período de votación para a elección do Consello, si falou de "erro" da coordinadora ao difundir unha información, de "maniqueísmo de quen cumpre ou non cumpre", que sostén que se debería quedar no ámbito interno. "Eles saberán por que o fixeron", deixou caer, "é un tema interno e debe resolverse internamente", "hai suficientes aspectos para falar previos a unhas eleccións, e non de diñeiro".