Bruxelas afirma que o tren Vigo-Porto "non pode ser parte da rede básica" do corredor Atlántico

A Comisión Europea respondeu ao Eixo Atlántico que a vía de ferrocarril entre Vigo e Porto "non pode ser parte da rede básica" do corredor do Atlántico. O Eixo preguntou á Comisión se este tren sería incluído ou non no mencionado corredor, ao que Bruxelas responde que non pode "confirmar este feito". Na resposta, remitida aos medios de comunicación, o órgano executivo da Unión engade, iso si, que esta conexión está incluída nunha lista de seccións transfronteirizas "elixibles para unha cofinanciación máxima do 50%".

Explica na súa comunicación que a rede transeuropea de transporte consiste nunha "estrutura de dúas capas: a rede global (como concepto amplo) e a rede básica". A vía de ferrocarril entre Porto e Vigo, precisa, é parte da vía de ferrocarril global. "Como tal, a liña non pode ser parte da rede básica do corredor Atlántico. Só as vías que están na rede básica son elixibles para chegar a ser seccións da rede de corredores básica", advirte.

Con todo, engade que, na súa proposta para a normativa do instrumento 'Conectar Europa 2', a Comisión incluíu a conexión entre Porto e Vigo na lista de seccións transfronteirizas "preidentificadas na rede global". "Nesta proposta as seccións transfronteirizas dentro da rede global serán elegibles para unha cofinanciación máxima do 50% baixo certas condicións", destaca.

"PODERÁ REVISARSE"

A proposta para a normativa 'CEF2', segundo agrega, está en discusión no Parlamento Europeo e no Consello. O comité de Transporte e Turismo do Parlamento votou o seu informe o 22 de novembro e "espérase que o Consello chegue a un acordo parcial na súa reunión do 3 de decembro".

Por último, a Comisión Europea traslada ao Eixo Atlántico que "unha revisión da rede básica está prevista pola Comisión para 2023 como moi tarde". Entón, "o status da liña Porto-Vigo poderá revisarse", finaliza.