O delegado do Goberno en Galicia, "esperanzado" co mantemento do emprego de Alcoa na Coruña

O delegado do Goberno en Galicia, Javier Losada, móstrase "esperanzado" co mantemento do emprego da factoría de Alcoa na Coruña ante a posibilidade de atopar un novo investidor que se faga cargo da factoría, pero sen descartar que a multinacional norteamericana retire o ERE extintivo e manteña a súa actividade, e asegura que "hai partido".

Tras pór en valor que se "conseguiu que a empresa sentase a negociar" e non puxese o 30 de novembro como "data última para a súa decisión", en entrevista na Radio Galega afirmou que "se van dando pasos neste partido que hai que xogar até o último minuto".

Losada subliña a "unidade de acción" alcanzada entre traballadores e institucións pero tamén o traballo do Goberno, a través dos Ministerios de Industria e Transición Enerxética, que se orienta a definir un "marco enerxético" en paralelo a lograr un novo investidor "para manter o que Alcoa non quere". En todo caso, remarca que o primeiro obxectivo segue sendo tentar que a multinacional continúe a súa actividade na Coruña e Avilés.

"É difícil, é complicado, pero até o último momento hai que dalo todo, como nos partidos de fútbol; hai partido", remarcou un Javier Losada que minimiza a sensación inicial de enfrontamento entre administracións pola repartición de culpas e prefire destacar a "unidade" lograda entre os gobernos de Galicia, Asturias e o Executivo central, os sindicatos e o Comité de Empresa.

O delegado do Goberno recoñece, no entanto, que fronte á actuación de Alcoa, cuxo expediente de regulación de emprego estuda o Ministerio de Traballo para determinar se é impugnable, "a reforma laboral" aprobada polo PP limita moito as posibles accións do Executivo.

E vinculada á cuestión de Alcoa tamén xorde a pregunta sobre o futuro das plantas de Meirama e As Pontes. Losada móstrase contundente respecto diso e defende que se manterá a actividade, aínda que o Goberno traballa "no camiño que marca Europa".

"Estou contento de que quede claro que As Pontes vai seguir aberta e que todas as centrais térmicas que cumpran os seus investimentos seguiranse mantendo, pero o que fai Transición Ecolóxica é pór datas para que con planificación e axustándose ás directivas váianse pondo as industrias, os consumidores, as administracións nunha dirección, que hai que traballar polo futuro do planeta, do clima, con menos contaminación e enerxías limpas", puntualizou.

LOSADA INSTA O ALCALDE DE TUI A "MOVER FICHA" 

O delegado do Goberno tamén se referiu á situación de Tui, tras a explosión pirotécnica dun almacén ilegal na parroquia de Paramos no pasado mes de maio.

Javier Losada insta o alcalde a "mover ficha" para acometer o desentullo da denominada zona cero e defende que o Goberno fixo "todo" o que solicitaron os afectados, como as exencións nas axudas ou no IRPF.

Pero no que respecta ao desentullo, asegurou que o Concello ten que establecer un convenio que estea articulado conforme á legalidade.

"Eu o que pido é que o alcalde faga o seu traballo, nós como Goberno fixemos todo, mesmo traballar para que se poida facer o desentullo da parroquia, pero o que ten que articularse é o que marca a legalidade", remarcou, para apelar a continuación á Xunta, porque "tería que axudar ao concello cando está limitado" para a realización de determinados trámites.

"Nós estamos dispostos a axudar a redactar o convenio pero o que ten que mover ficha é o Concello", e reiterou: "Iso ten unha tramitación que o que pido ao alcalde son menos palabras e máis feitos".

Cuestionado pola ausencia da subdelegación do Goberno en Pontevedra na última reunión con afectados, Xunta e Concello, Losada argumenta que se trata dunha "reunión que non ten razón de ser porque esa comisión se fixo cando había unha emerxencia, nese momento, cando acabou a emerxencia, terminou o fin desa comisión".

"Agora hai un acordo do Consello de Ministros, de compromiso e de solidariedade con veciños e afectados, facendo por primeira vez na historia da democracia cunha declaración de zona catastrófica das características de Paramos e Tui, nunca se fixo, pero foi compromiso do Goberno do Estado, que cando nós tomamos a acción do goberno non se moveu nin unha mínima carta nin decisión, nós fixémolo", quixo remarcar.

CINCO MESES NA DELEGACIÓN DO GOBERNO

Cinco meses despois do seu nomeamento como delegado do Gobieno, Javier Losada reivindica a súa xestión e confróntaa coa dun PP co que a Delegación "estaba como desaparecida" e "parecía que fose subsidiaria doutras administracións".

Losada pon de relevo que o Executivo de Pedro Sánchez conseguise así estar presente "en toda a actividade social, política, económica e cidadá de Galicia" e que, a través da Delegación, se transmitan os seus avances nas "pensións, as bolsas, as infraestruturas, a sanidade, a educación, o benestar, con aquelas cousas que se están recuperando en dereitos, cooperando legalmente coa Xunta de Galicia e as Deputacións".

DELINCUENCIA E SINISTRALIDADE VIARIA

Sobre o balance de Galicia, o delegado do Goberno lembrou que se trata "dunha das comunidades máis seguras, con menos delitos e con mellores resultados de investigación", dentro dun dos Estados máis seguros da UE.

Percibe unha excelente "coordinación" entre as forzas e corpos de seguridade do Estado e apuntou que os delitos vinculados coas novas tecnoloxías son un dos eixos do traballo actual.

Unha das súas principais preocupacións, segundo recoñeceu, son os accidentes de tráfico, en especial nun ano no que aumentou o número de falecidos nas estradas galegas e crebouse a tendencia descendente da última década.

"Foi un ano malo e debemos porlle freo", declarou. Javier Losada alertou sobre a vinculación da maior parte dos accidentes co uso de teléfonos móbiles e aparellos electrónicos, ademais do consumo de alcol e drogas, así como á ausencia do uso do cinto de seguridade en moitos dos accidentes mortais deste ano en Galicia.

INÉS REI, "GRAN CANDIDATA" E "CORUÑESA DE PROL"

Javier Losada tamén foi cuestionado pola elección nas primarias de Inés Rei como candidata socialista á alcaldía da Coruña. O ex rexedor coruñés enxalzou que se trata dunha "gran candidata", elixida de forma "democrática e transparente", e que a pesar de ser unha persona nova "ten unha gran experiencia" en política, ademais de ser "unha coruñesa de prol, que coñece a cidade e vive a cidade".