Unha muller é trasladada ao CHUAC despois de ser atropelada en Culleredo

Unha muller resultou ferida este martes en Culleredo ao ser atropelada nun paso de peóns e foi trasladada polos efectivos sanitarios ao Complexo Hospitalario Universitario da Coruña.

Os feitos ocorreron no lugar da Corveira, uns minutos antes das 18,30 horas, segundo a información da que dispón o 112. Varios particulares alertaron do atropelo e indicaron que sucedera na Avenida de Vilaboa.

A partir de aí, os xestores do 112 puxeron a situación en coñecemento do 061-Urxencias Sanitarias, da Policía Local, de Protección Civil e dos Bombeiros de Arteixo.