O delegado do Goberno en Galicia apoia reformar a Constitución, pero con consenso

O delegado do Goberno en Galicia, Javier Losada, pediu consenso para reformar a Constitución "e seguir avanzando", durante a súa intervención no acto conmemorativo dos 40 anos. Ademais, rexeitou que se poida falar de "eutanasia" da Carta Magna.

Javier Losada en conmemoración 40 anos Constitución. DELEGACIÓN DEL GOBIERNO | Fonte: Europa Press

Ante un cento de convidados —con presenza, entre outros do rexedor da Coruña, Xulio Ferreiro; o delegado territorial da Xunta, Ovidio Rodeiro; o secretario xeral do PSdeG, Gonzalo Caballero, e o presidente do Tribunal Superior de Xustiza de Galicia (TSXG), Miguel Ángel Cadenas—, Losada reivindicou unha Constitución "que segue atendendo ás demandas do presente".

Con todo, considerou que a sociedade española "non está polo inmobilismo", do que dixo que é "o primeiro inimigo das democracias que queren mellorar". Por ese motivo, mostrou o seu apoio a introducir reformas na Constitución, pero apelando ao "consenso" para abordalas.

Losada aproveitou tamén a súa intervención para defender a moción de censura que levou a Pedro Sánchez á Presidencia do Goberno, incidindo en que esta ten cabida na Constitución. Por iso, rexeitou que a citada moción se poida cualificar de "disparate constitucional", en referencia ás críticas efectuadas no seu momento polo presidente da Xunta, Alberto Núñez Feijóo.

No seu discurso, rexeitou, así mesmo, que se poida falar de "eutanasia" da Constitución, despois de que o BNG considerase que deba darse "por morta". Mentres, defendeu a liberdade de ideas, "pero dentro do marco constitucional".

"Ninguén pode arrogarse o dereito de repartir carnés constitucionalistas", expuxo tamén fronte as críticas do PP á posibilidade de acometer reformas. "A vontade do Goberno é seguir avanzando", insistiu Losada, quen avogou por traballar para mellorar a "cooperación" entre as administracións.