O prezo da vivenda libre sobe un 4,1% en Galicia, case a metade que a media

A cifra corresponde a datos do terceiro trimestre deste ano. En canto ao valor da vivenda nova, este dispárase un 6,1%, mentres o da usada repunta un 2,9%

Por Europa Press / Redacción | SANTIAGO DE COMPOSTELA | 07/12/2018 | Actualizada ás 11:51

Comparte esta noticia

O prezo da vivenda libre subiu en Galicia no terceiro trimestre un 4,1% en relación co mesmo período do ano anterior, de acordo cos datos que publica este venres o Instituto Nacional de Estatística (INE).

Evolución do prezo da vivenda. EPDATA
Evolución do prezo da vivenda. EPDATA | Fonte: Europa Press

O índice de prezos de vivenda reflicte un ascenso do 6,1% do valor da vivenda nova en taxa interanual na comunidade galega, mentres que o da usada incrementouse un 2,9%.

En variación intertrimestral, no terceiro trimestre de 2018 respecto ao segundo, o prezo da vivenda libre aumentou un 1,8%: creceu un 2,5% para a nova e un 1,6% para a de segunda man.

Deste xeito, no que vai de ano, os prezos da vivenda libre galega acumulan un repunte do 3,5%, que é do 6,9% no caso da nova e do 3,8% no da usada.

DATOS A NIVEL ESTATAL

No conxunto estatal, o prezo medio da vivenda libre subiu un 7,2% no terceiro trimestre en taxa interanual, catro décimas máis que no trimestre anterior.

Con este incremento, o máis acusado desde o último trimestre do ano pasado, xa son 18 os trimestres consecutivos nos que os prezos da vivenda presentan taxas interanuais positivas.

Por tipo de vivenda, o prezo medio das de segunda man aumentou un 7,3% interanual no terceiro trimestre, tres décimas máis que no trimestre anterior, o que supón a súa maior suba en once anos, en concreto desde o terceiro trimestre de 2007.

No caso das vivendas novas, o seu prezo avanzou unha media do 6,1% no mesmo período, catro décimas por encima do dato do segundo trimestre e o seu maior repunte trimestral do ano.

En taxa intertrimestral, o prezo medio da vivenda repuntou un 2,2% entre xullo e setembro, fronte á alza do 2,6% que rexistrou no trimestre anterior e o aumento do 1,8% que experimentou no terceiro trimestre de 2017.

Por tipo de vivenda, os prezos da vivenda nova avanzaron un 2% entre o terceiro e o segundo trimestre deste ano, mentres que os de vivendas de segunda man subiron un 2,2%.

TODAS AS COMUNIDADES ELEVAN PREZOS

No terceiro trimestre de 2018, todas as comunidades autónomas mais as cidades de Ceuta e Melilla rexistraron taxas medias positivas no prezo da vivenda en taxa interanual.

Os aumentos máis pronunciados de prezos corresponderon a Madrid (+10,9%), Melilla (+9,3%), Cataluña (+9,1%), Ceuta (+8,9%) e Baleares (+7%). Onde menos aumentaron os prezos foi en Estremadura (+2,2%), Castela-A Mancha (+3,2%), Murcia (+3,9%) e Galicia (+4,1%).

Así mesmo, en termos intertrimestrais, os prezos da vivenda presentaron taxas positivas no terceiro trimestre de 2018 en todas as comunidades autónomas.

As maiores subas trimestrais prodúcense en Baleares (+3,7%), Madrid (+3,3%), Murcia (+2,5%), Asturias (+2,4%) e Cataluña (+2,3%). Pola súa banda, Canarias e Cantabria (+0,4% en ambos os casos), Estremadura (+0,5%) e País Vasco (+1%) rexistran os menores aumentos trimestrais de prezos.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta