Por Europa Press / Redacción | SANTIAGO DE COMPOSTELA | 12/12/2018 | Actualizada ás 14:55
O presidente da Xunta, Alberto Núñez Feijóo, terá que responder a próxima semana no Parlamento sobre a situación da sanidade galega, asunto no que a oposición centrará un pleno no que non comparecerá o conselleiro que leva a carteira sanitaria, Jesús Vázquez Almuiña, a pesar da demanda unánime de En Marea, PSdeG e BNG.
Tras a Xunta de Portavoces deste mércores, na que se abordaron as ordes do día do pleno ordinario e tamén do que deixará listos os orzamentos galegos para 2019, os tres portavoces da oposición denunciaron o "veto" dos populares a que compareza Almuiña despois da dimisión en bloque de xefes de servizo e unidade de Atención Primaria na área de Vigo.
O portavoz de En Marea, Luís Villares, censurou "o portazo" dos populares a esta petición de comparecencia formalizada na reunión previa e esixiu a dimisión "inmediata" de Almuiña; demanda que comparten os socialistas e os nacionalistas, aínda que consideran que o cesamento do responsable de Sanidade sen un cambio de políticas "non soluciona nada" --segundo Xoaquín Fernández Leiceaga (PSdeG) e Ana Pontón (BNG)--.
Pola súa banda, o portavoz parlamentario do PPdeG, Pedro Puy, defendeu a "magnífica xestión" de Almuiña e lembrou que este vai comparecer na comisión de investigación sobre sanidade activada "a petición" --lembrou-- da propia oposición. "Alí terán unha magnífica oportunidade de escoitalo en tres ou catro semanas, segundo van os prazos", esgrimiu.
A oposición deixou de participar neste órgano molesta polo rexeitamento do PP a incluír comparecencias que solicitaran, pero Puy incidiu que neste foro xa está "anunciada" a comparecencia de Almuiña e suxeriu que son os rivais políticos dos populares quen cometen "un abandono de funcións" ao obviar esta comisión. Á marxe, lembrou que só Feijóo ten competencia para nomear ou cesar aos seus conselleiros.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.