Por Silvia López | Santiago de Compostela | 15/12/2018 | Actualizada ás 16:15
Nun tempo no que os datos editoriais non deixan moito oco á esperanza, os novos proxectos que agroman son cualificados de afoutos e arriscados. Podería ser este o caso de Cousa Nostra, unha editorial que aposta nada máis e nada menos ca pola fotografía de autor. A iniciativa preséntase este mesmo 15 de decembro na Casa de Cultura Vila Concepción de Cambre (A Coruña), ás 19.00 horas.
Alberte Sánchez, un dos editores que encabeza o proxecto, admítese sabedor das dificultades que atravesa o mundo editorial. De feito, as últimas estatísticas indican que o número de títulos editados en Galicia caeu nun 5,9%. Aínda así, os promotores de Cousa Nostra coidan que a súa intención é a de ser un "motor de expansión e difusión da creatividade fotográfica en Galicia".
A fotografía de autor, di Alberte, adoita ver a luz a través da autoedición. "Nós queremos darlle unha saída digna a estes libros: que leven un ISBN, un depósito legal, que se poidan comprar en liña ou onde sexa" e evitar así que esas publicacións á marxe dos circuítos habituais queden relegadas ao "caixón do esquecemento".
Con este obxectivo, os artistas que inauguran esta primeira colección son Simone Maestra, Luís Botana e Carolina Martínez. Todos eles -xunto con Mercedes Queixas Zas, secretaria da Asociación de Escritores/as en Lingua Galega, e Marcos Ferreiro, o outro editor de Cousa Nostra- participarán no acto de presentación desta tarde. Os propios autores "teñen poder de decisión sobre o deseño do seu libro", que será sempre tratado con moito agarimo, explica Alberte Sánchez.
A súa aposta constitúe, ademais, unha sorte de contrapunto fronte á saturación de imaxes momentáneas que inundan as redes sociais. "Realmente, cando un fotógrafo traballa nunha serie fotográfica está creando unha narración", e iso é o que se traslada á publicación final. Pola contra, as fotos instantáneas da Internet quedan frecuentemente xusto niso, no intre. "Non digo que estean mal, simplemente que é outra cousa distinta", recalca o representante de Cousa Nostra.
Respecto do seu público obxectivo, esta editorial non se pecha a nada: diríxese tanto a aqueles lectores que se encadren máis nun perfil próximo ao de coleccionista, como a un público xeral. Con esa filosofía de facer casar eses dous colectivos, os seus primeiros libros irán numerados e asinados polo autor ou autora, pero tamén contarán cun prezo "bastante asequible" para todos os petos.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.