Liberadas tres persoas en senllos accidentes de tráfico en Mos, A Guarda e Noia
Os bombeiros tiveron que intervir en tres situacións nas que os condutores quedaran atrapados nos seus vehículos.
Por E.P. | SANTIAGO DE COMPOSTELA | 15/12/2018 | Actualizada ás 14:54
O 112 Galicia rexistrou na mañá deste sábado tres accidentes de tráfico nos que foi necesaria a intervención dos bombeiros para liberar a outros tantos condutores atrapados nos seus vehículos. Tiveron lugar nas localidades pontevedresas de Mos e A Guarda, e en Noia (A Coruña).
En concreto, preto das 12.00 horas, un vehículo que circulaba pola Rúa Bechos, na Guarda, botouse da estrada e chocou contra un turismo que se atopaba estacionado. Como consecuencia do impacto, o coche envorcou e o home que viaxaba no interior necesitou da axuda dos efectivos de emerxencias para poder saír. No operativo participaron membros do GES da localidade, así como da Policía Local e do 061, que trasladou a un centro hospitalario á vítima.
Uns minutos máis tarde, outro vehículo, neste caso un camión, envorcou na parroquia mosense de Sanguiñeda. Para poder liberar ao condutor, acudiron ao lugar do accidente os Bombeiros do Baixo Miño. Posteriormente, o ferido foi atendido por un equipo médico.
Finalmente, sobre as 10,00 horas, os servizos de emerxencias tiveron noticia dun vehículo envorcado na parroquia de Obre, en Noia. A causa do golpe, o condutor quedou atrapado e tamén necesitou da axuda dos Bombeiros de Boiro e dos membros do servizo local de emerxencias da localidade para poder saír do coche e ser atendido polos servizos sanitarios de urxencia.
