Por E.P. | SANTIAGO DE COMPOSTELA | 18/12/2018 | Actualizada ás 12:17
A situación da sanidade pública galega centra o debate dos orzamentos da Xunta para 2019 este martes no pleno do Parlamento, onde a oposición (En Marea, PSdeG e BNG) esixiu ao PP "rectificar" nunhas políticas que, ao seu xuízo, levan ao "caos" organizativo neste ámbito.
Pola súa banda, os populares reivindicaron a rectificación no caso concreto da pediatría: "Nós escoitamos, razoamos e cando algo nos parece razoable incorporámolo ás nosas emendas".
Tras a aprobación durante a tramitación previa do proxecto de lei de sete emendas do PP, catro do PSOE e outras dúas transaccionadas (unha cos socialistas e outra con En Marea), e despois da retirada dunha do PSdeG, mantivéronse para este pleno 1.427.
En concreto, son 431 de En Marea (51 ao articulado e 380 ao estado numérico dos orzamentos), 619 do PSdeG (73 ao articulado e 546 ao estado numérico) e 377 do BNG (35 ao articulado e 377 ao estado numérico).
Despois da presentación do ditame e o debate do estado de gastos e o articulado, produciranse as votacións, a última hora da mañá. Xa pola tarde está previsto que os grupos aborden a coñecida como lei de acompañamento.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.