Ciudadanos vota en contra do traspaso da AP-9 á Xunta
En Marea, co apoio do Grupo Mixto, solicitou que a proposición de lei fose tramitada polo procedemento exprés.
Por Europa Press / Redacción | MADRID | 18/12/2018 | Actualizada ás 14:25
A Mesa do Congreso acordou este martes tramitar polo procedemento de urxencia e en lectura única a proposición de lei do Parlamento galego para traspasar á Xunta a autoestrada de peaxe AP-9, pero non foi por unanimidade, xa que Ciudadanos votou en contra.
Esta iniciativa, que foi aprobada por unanimidade en Galicia, foi tomada en consideración polo Pleno do Congreso a pasada semana co único voto en contra de Ciudadanos, que a considera un "agasallo electoralista".
En Marea, co apoio do Grupo Mixto, solicitou que a proposición de lei fose tramitada polo procedemento exprés, unha petición que se debateu no órgano de goberno da Cámara Baixa e que foi aceptada, segundo indicaron a Europa Press fontes parlamentarias.
O procedemento de urxencia supón acurtar á metade os prazos de emendas, mentres que a lectura única supón liquidar todos os trámites parlamentarios (relatorio, comisión e Pleno) nunha semana, e todo en sesión plenaria. Ciudadanos votou en contra alegando esta vía exprés está a xeralizarse en exceso.
Así as cousas, a tramitación parlamentaria do traspaso da AP-9 poderíase resolver en febreiro ou marzo, a condición de que non haxa dilacións por prórrogas do prazo de presentación de emendas.
