Por Galicia Confidencial | O Pino-Touro | 19/12/2018 | Actualizada ás 17:59
O último pleno ordinario do ano no Concello do Pino celebrouse este mércores. Os grupos da oposición, PSOE e BNG, presentaron conxuntamente unha moción solicitando a presentación de novas alegacións ao proxecto mineiro de cobre a ceo aberto. Todo “logo de coñecer os novos informes e documentos presentados pola promotora e o informe do ICOMOS sobre a afección da mina ó Camiño de Santiago como patrimonio mundial da UNESCO”.
O alcalde do Pino, Manuel Taboada, informaba que a Xunta non remitira nova documentación ó concello. Mais unha vez recibida, estudiaríase e faríanse as achegas pertinentes. Non obstante, respecto ó recente informe técnico do Comité Internacional de Monumentos e Sitios (ICOMOS), o rexedor demostrou o seu total descoñecemento do mesmo.
Taboada mesmo argumentou que “parece que ICOMOS vén cunha pataleta, dicindo agora o que non dixo antes”. Segundo a Plataforma Veciñal, referíase a que “no pasado este organismo manifestara que non era preciso ampliar a zona de respecto do Camiño”.
A mesma Plataforma considera “que desde a Corporación Municipal nada se vai facer por protexer este ben patrimonio da humanidade que é, ademáis, parte fundamental do tecido socioeconómico do municipio”.
Pódese descargar aquí o informe completo de ICOMOS España:
Aquí pódese ver o video no que Taboada di que o informe do ICOMOS é unha pataleta:
Por outra banda “o alcalde do Pino manifestou non ter recibido aínda a nova documentación de resposta de Cobre San Rafael ás alegacións particulares e ós informes técnicos solicitados pola Xunta de Galicia”. Aínda así, varios membros da Plataforma Veciñal Mina Touro – O Pino NON xa fixeron entrega este martes pasado as súas alegacións no Rexistro Xeral da Xunta, “posto que a información aportada pola empresa evidencia que o proxecto non sufríu ningún cambio substantivo, e seguen sin aportar toda a documentación requerida pola Administración”.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.