Galicia, única comunidade onde non medran as vendas do comercio polo miúdo no mes do 'Black Friday'
A nivel estatal, rexistrouse un incremento do 1'5% respecto de novembro do 2017.
Por E.P. | SANTIAGO DE COMPOSTELA | 27/12/2018 | Actualizada ás 11:38
Galicia é a única comunidade autónoma na que non creceron as vendas do comercio polo miúdo en novembro, respecto do mesmo mes de 2017. Así o indican os datos que publica este xoves o Instituto Nacional de Estatística (INE).
Así, as vendas galegas mantéñense invariables de forma interanual, á cola da lista de comunidades, mentres que na media española hai un incremento do 1,5% en novembro, mes no que se celebra o 'Black Friday' e o 'Ciber Monday'.
A facturación interanual das vendas polo miúdo en Galicia viña dun dato positivo en outubro (+3,6%), logo de diminuír un 3,1% en setembro. De media, no que vai de ano prodúcese un aumento do 0,9% na Comunidade.
Pola súa banda, en novembro houbo un aumento da ocupación en Galicia do 1'1%. Neste caso, é similar á suba da media de comunidades (+1,2%).
