Traballadores do servizo telefónico do 061 volverán á folga o 21 de xaneiro

Traballadores do servizo de atención telefónica do 061 volverán á folga o próximo 21 de xaneiro, segundo informa a CIG, "en resposta aos incumprimentos salariais e laborais por parte da empresa concesionaria, Grupo Norte".

A decisión, de acordo coa central nacionalista, foi adoptada en asemblea este mércores, cando tamén se aprobou desenvolver outras "medidas de presión para esixir o pago dos pluses de compensación polo traslado do centro de traballo á Estrada". A CIG sinala que, ao anunciar Grupo Norte a eliminación destas extras, está incumprindo o laudo que puxera fin ao conflito derivado do traslado. 

"Este incumprimento súmase á decisión unilateral da empresa de reducir os pagos de incentivos en decembro de 2017 do 7,5% ao 5% da masa salarial e o incumprimento das cláusulas sociais ofertadas no concurso no que gañou a concesión", apunta.

Antes da folga, o 15 de xaneiro, está prevista unha nova reunión no marco do Consello Galego de Relacións Laborais, que foi solicitada por decisión do comité.

AMBULANCIAS DO 061

Por outra banda, a central nacionalista emitiu outra nota de prensa na que advirte de que  "non vai consentir en ningún caso que sexan os traballadores os que paguen a mala xestión das compañías adxudicatarias da Xunta". Así o expresan logo de que as empresas de ambulancias do 061 avanzaran que valoran deixar de prestar servizo a partir de marzo.

Este anuncio, ao seu xuízo, é "a confirmación do que a CIG leva tempo denunciando: que os contratos se adxudicaron por baixo dos custos reais e que as empresas presentaron ofertas temerarias, aínda sabendo que así non poderían cumprir coas condicións recollidas nos pregos nin no convenio colectivo de aplicación".