Por Europa Press / Redacción | SANTIAGO DE COMPOSTELA | 30/12/2018 | Actualizada ás 18:30
A formación política En Marea desenvolverá o vindeiro sábado 12 de xaneiro a xornada 'A vivenda, máis aló do mercado. Un dereito efectivo', na que contará con distintos expertos que analizarán e debaterán sobre a situación inmobiliaria e exporán alternativas que garantan o acceso a toda a cidadanía a unha vivenda digna.
A xornada celebrarase no Hotel Santiago Apóstolo de Santiago de Compostela e contará coa presenza, entre outros, da arquitecta e conselleira de Vivenda durante o goberno bipartito, Teresa Táboas; a profesora de Dereito Administrativo da USC Alba Nogueira; o director de Planificación do goberno vasco, Mario José Yoldi Domínguez, así como o portavoz de En Marea, Luís Villares e as deputadas Paula Vázquez Verao e Flora Miranda.
En Marea alerta de que a pesar de que a crise vai pasando os desafiuzamentos séguense sucedendo e gran parte da cidadanía "ten dificultades, ou directamente non é capaz de acceder a unha vivenda digna". Debido á "lei do mercado e os intereses de bancos, construtores e fondos voitres", En Marea demanda unha maior intervención das administracións e unha aposta decidida para incrementar o parque de vivenda pública, con vivendas de calidade e a prezos xustos e non especulativos. As sesións estruturaranse en catro bloques. Sobre o 'Marco Autonómico da Vivenda' achegarán experiencia e puntos de vista Teresa Táboas, Alba Nogueira e Mario José Yoldi.
A xornada continuará abordando o 'Exercicio do dereito á vivenda e ao acompañamento: factores craves para a inclusión social', coa participación de Ana Pardo Fernández, traballadora social responsable territorial do programa internacional Provivenda; Ángela Conde Groba, educadora social e responsable de integración de Provivenda, e Juncal Branco Granadeiro, responsable do programa Emaús Galicia.
No seguinte debate intervirá o segundo tenente de alcalde de Parada de Silvestres, Francisco Magide Bizarro; Adolfo Muíños Sánchez-Brunete, alcalde de Rianxo, e Jorge Duarte, concelleiro de Espazos Cidadáns de Santiago. A xornada terminará coas achegas 'A ter en conta', con Rubén Lois, profesor de Xeografía e Historia da USC, a arquitecta María Novas sobre vivenda e xénero e o arquitecto Iago Lestegás. As inscricións para participar na xornada pódense realizar a partir deste luns.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.