Gonzalo Caballero: "O PSdeG é a alternativa fronte á dereita"

Rexeita pactos co PP tras as municipais e quita ferro á marcha de Pachi Vázquez e as posibles candidaturas que promova en Ourense.

Por Europa Press / Redacción | SANTIAGO DE COMPOSTELA | 06/01/2019 | Actualizada ás 18:31

Comparte esta noticia

O secretario xeral do PSdeG, Gonzalo Caballero, rexeitou a posibilidade de articular pactos de goberno co PP tras as eleccións municipais do mes de maio. Ademais, reitera, como xa adiantou nunha entrevista en Europa Press, que entrará no Parlamento de Galicia antes de que finalice o curso político no próximo verán.

Gonzalo Caballero
Gonzalo Caballero | Fonte: Europa Press

Caballero, nunha entrevista na Cadea Ser este domingo, asegurou que o Partido Socialista encara "con toda a forza" e coa "maquinaria perfectamente engrasada" a cita coas urnas do 26 de maio, nas que, ao seu xuízo, o PSOE está en posición de ser a "primeira forza" a nivel estatal.

Así, descarta posibles pactos de goberno nos concellos galegos cun Partido Popular que ve "desnortado" e cun xiro discursivo "á dereita" desde que Pablo Casado tomou as rendas da formación. "Non vexo ningún escenario nos próximos tempos e nos próximos anos que permitan ao PSOE e ao Partido Popular ter pactos", aseverou.

"Somos unha alternativa fronte á dereita, unha alternativa coa que se pode falar e desde logo temos a posibilidade de establecer con todo o arco parlamentario posibles acordos puntuais en proxectos de país, dialogar, acordar e acordar con espírito de convivencia", engadiu o economista vigués.

PACHI VÁZQUEZ

Por outra banda, Gonzalo Caballero quita ferro á marcha do partido dun dos seus mandatarios históricos, o exsecretario xeral Pachi Vázquez, que podería articular candidaturas alternativas ao PSOE na provincia de ourensá.

Isto último non inqueda ao líder socialista, que ve á formación que encabeza con "unha clara folla de ruta para recuperar espazo político e electoral" polo que non cre que supoña "un risco importante" que Vázquez e os seus afíns compitan nas urnas co PSOE.

ENTRADA NO PARLAMENTO

Así mesmo, Gonzalo Caballero reitera que a súa intención é entrar no Parlamento de Galicia antes de que conclúa o curso político o próximo verán, algo que xa adiantara nunha entrevista con Europa Press. No entanto, non concreta se dará o paso antes ou logo das municipais.

"Sen poder dar unha data precisa, se lle podo confirmar que probablemente de aquí ao verán o secretario xeral do partido será deputado autonómico e a intención é que presida o Grupo Parlamentario", dixo, logo de encomiar o traballo do actual portavoz, Xoaquín Ferández Leiceaga.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta