Por Europa Press / Redacción | SANTIAGO DE COMPOSTELA | 07/01/2019 | Actualizada ás 18:09
A viceportavoz do Grupo Popular no Parlamento de Galicia, Paula Prado, anunciou a "continuidade" dos traballos da comisión de investigación da sanidade pública galega e insistiu nas súas críticas aos partidos da oposición --En Marea, PSDEG e BNG-- por abandonar este órgano creado por eles mesmos, despois de que o PP aprobase en solitario a folla de ruta a empregar.
"Seguimos insistindo en que deberían reincorporarse se realmente queren confrontar ideas e afrontar solucións a defectos que poida ter (a sanidade). Desde tuiter ou os pasilllos do Parlamento non se solucionan os problemas nin se achegan solucións efectivas", aseverou.
Nunha rolda de prensa, Prado avanzou as liñas nas que continuará traballando a comisión, que se renovará este martes coa comparecencia de representantes dos sindicatos CIG, CC.OO., UXT e CSIF. De igual modo, o mércores continuarán SATSE e CESM-Omega. Así, a viceportavoz do PP no Pazo do Hórreo valorou que todas estas organizacións foran "propostas polos grupos da oposición" tamén.
Nos próximos días, comparecerán, entre outros, o presidente do Consello Galego de Colexios Médicos, José Luís Jiménez Martínez; o decano da Facultade de Medicina da Universidade de Santiago de Compostela (USC), Julián Álvarez Escudeiro; e pechará a semana o conselleiro de Sanidade, Jesús Vázquez Almuiña.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.