A conselleira de Infraestruturas incómoda co tirón de orellas do alcalde de Santiago

Martiño Noriega di que Ethel Vázquez "leva tempo practicando políticas partidarias e non institucionais" para evitar o avance da Intermodal.

Por E.P. | SANTIAGO DE COMPOSTELA | 14/01/2019 | Actualizada ás 17:49

Comparte esta noticia

A Consellería de Infraestruturas respondeu ao alcalde de Santiago, Martiño Noriega, ao que solicitou que "abandone as acusacións políticas e as continuas descualificacións persoais á conselleira", Ethel Vázquez, en relación á intermodal compostelá.

Ethel Vázquez. XUNTA - Arquivo
Ethel Vázquez. XUNTA - Arquivo

Nun comunicado de prensa, pediu ao rexedor da capital galega que "centre os seus esforzos no traballo técnico necesario para garantir que a estación intermodal de Santiago teña os accesos que aseguren a súa operatividade nos prazos necesarios".

A consellería criticou que, o pasado venres, día en que Ethel Vázquez visitou o avance das obras, acompañada polo concelleiro Jorge Duarte, a Xunta recibiu do concello "un proxecto que carece da calidade técnica necesaria para un traballo deste tipo". Nesta liña, engadiu que "non está sustentado sobre un estudo en profundidade do tráfico que garanta a fluidez e a circulación futura, unha mellor ordenación viaria na contorna e o funcionamento áxil e eficaz da terminal".

"FALTA DE AVANCES"

A consellería expresou a súa "preocupación" pola "falta de avances" por parte do concello santiagués "na súa responsabilidade de construción de accesos adecuados". Ademais, destacou que a responsabilidade municipal "leva acumulados atrasos" e que se verá afectada por "a falta de orzamentos" en Santiago.

O departamento de Ethel Vázquez destacou que as obras, que avanzan a "bo ritmo", garanten a posta en servizo en 2020, data na que é preciso "ter os accesos necesarios para o funcionamento da estación". Neste sentido, a Consellería de Infraestruturas alertou sobre a posibilidade de que conclúan as obras da estación de autobuses e que "non poida funcionar por non ter os accesos adecuados".

NORIEGA CRITICA A FALTA DE "LEALDADE INSTITUCIONAL" DE ETHEL VÁZQUEZ

Martiño Noriega, en declaracións a Radio Galega, lamentou que Ethel Vázquez "leva tempo practicando políticas partidarias e non institucionais, a diferenza doutros conselleiros que teñen trato leal co Concello de Santiago".

O alcalde asegurou que o fai de xeito sistemático" e preguntouse os motivos: "Non sei se ten algo que ver con que fora subordinada do actual portavoz do PP de Santiago, Agustín Hernández, cando era conselleiro", comentou.

Noriega recordou que "sempre" defenderon que "non era posible facer coincidir a execución dos accesos coa execución da estación de autobuses" e garantiu que manteñen os prazos, "a diferenza do que di a conselleira, con pouca lealdade institucional".

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta